عێراق ناتوانێت له‌ بڕیارى داخستنى سنوره‌کان و فڕۆکه‌خانه‌کان به‌رده‌وام بێت

ئابوریناس دكتۆر صه‌باح خۆشناو  له‌لێدوانێكى تایبه‌ت به‌ ماڵپه‌ڕى ده‌زگاى سه‌ته‌لاییتى كوردستاندا رایگه‌یاند: هه‌وڵه‌كانى عێراق بۆ داخستنى سنووره‌كانى هه‌رێمى كوردستان و له‌كارخستنى هه‌ردوو فڕكه‌خانه‌كانى هه‌ولێر و سلێمانى بۆ ماوه‌یه‌كى كاتییه‌، چونكه‌ زیانى زۆر  به‌ ئابورى عێراق ده‌گه‌یه‌نێت، به‌ڕاده‌یه‌ك كه‌ فشار ده‌خاته‌ سه‌ر حكومه‌تى عێراق بۆ هه‌ڵوه‌شاندنه‌وه‌ى بڕیاره‌كه‌ى.

دكتۆر صباح ده‌ڵێت: له‌ئه‌گه‌رى داخستنى ده‌روازه‌كان به‌تایبه‌ت ده‌روازه‌ى ئیبراهیم خه‌لیل و فڕۆكه‌خانه‌كان عێراق زیانى زۆرى به‌ر ده‌كه‌وێت له‌وانه‌ش:

1- هاورده‌كردنى عێراق له‌ توركیاوه‌ نامێنێت چونكه‌ ئێستا تاكه‌ ده‌روازه‌ى به‌یه‌كبه‌ستنه‌وه‌ى (عێراق و توركیا) هه‌رێمى كوردستانه‌، له‌به‌ر ئه‌م هۆیه‌ ناتوانێت نه‌وتیش هه‌نارده‌ بكات.

2- كاریگه‌رى له‌سه‌ر كه‌مبوونى داهاتى تاك ده‌بێت.

3- زیان به‌ر كه‌رتى بازرگانى عێراق ده‌كه‌وێت له‌گه‌ڵ هه‌رێمى كوردستان، چونكه‌ وه‌كو وتمان زۆربه‌ى پێویستییه‌كانى له‌ هه‌رێمى كوردستانه‌وه‌ هاورده‌ ده‌كات .

4- ته‌رازووى بازرگانى عێراق كورت ده‌هێنێت.

5- ته‌رازووى پێدان كورت ده‌هێنێت.

6- نرخى كه‌ل وپه‌ل له‌بازاڕه‌كانى عێراقدا به‌رزده‌بێته‌وه‌.

7- به‌هاى دراوى عێراقى داده‌به‌زێت.

8- ئاستى وه‌به‌رهێنان له‌ عێراق داده‌به‌زێت.

هه‌روه‌ها وتیشى:  ئه‌گه‌ر عێراق بڕیارى داخستنى سنوور بدات و گه‌شتى فڕۆكه‌خانه‌كان راگرێت له‌به‌ر ئه‌م زیانانه‌ى سه‌ره‌وه‌ ته‌نیا ده‌توانێت چه‌ند رۆژێك به‌رده‌وام بێت كه‌ به‌ بڕواى من ناگاته‌ مانگێك، چونكه‌ له‌ قه‌یراندایه‌ و به‌رگه‌ى قه‌یرانى دیكه‌ ناگرێت، ئه‌مه‌ جگه‌ له‌و فشاره‌ى كه‌ له‌لایه‌ن كۆمه‌ڵگاى نێوده‌وڵه‌تییه‌وه‌ ده‌خرێته‌ سه‌رى.

دكتۆر صه‌باح واى پێباشه‌ له‌م حاله‌ته‌دا هەوڵ بدرێت دراوی کوردستان چاپ بکرێت و شوێنی دراوی عێراق بگرێتەوە بۆ ئه‌وه‌ى سیاسەتی نەختینەیی لەدەست خۆمان بێت.

ئارام كاكه‌خان .. Kurdistan TV