كچێكی دیكه‌ی ئێزیدی كه ماوه‌ی سێ ساڵه له ژێر ده‌ستی تیرۆریستانی داعشدا بووه، به‌سه‌لامه‌تی گه‌یشته‌وه نێو سنووره‌كانی پێشمه‌رگه.
كه‌مال كه‌ركوكی به‌رپرسی میحوه‌ری رۆژئاوای كه‌ركوك به ماڵپه‌ری ده‌زگای سه‌ته‌لایتی كوردستانی راگه‌یاند : زیاتر له 2 هه‌زار ئاواره روویان له میحوه‌ره‌كه‌مان كردووه‌و لای ئێمه پارێزراون، تا رێو شوێنی یاسایی ده‌گیرێته به‌ر و كه‌مپیان بۆ دابین ده‌كرێ.
كه‌ركوكی گوتی: زۆربه‌ی هه‌ره زۆری ئاواره‌كان ژن و منداڵ و گه‌نجن ، خۆشیان دان به وه‌دا ده‌نێن كه هاوسه‌رو كوڕه‌كانیان داعشن ، به‌ڵام ئه‌وان چیتر نایانه‌وێ له ژێر چه‌تری ئه‌واندا بژین .
هه‌روه‌ها كه‌ركوكی گوتیشی: له ناو لێشاوی ئاواره‌كاندا خاتوونێكی ئێزیدی به ناوی (باسمه قاسم عه‌لی) كه خه‌ڵكی شنگاله و دانیشتووی گوندی كۆجۆیه، ئه‌میش له نێو ئاواره‌كاندایه ، ئێمه‌ش له ڕێگه‌ی نووسینگه‌ی رێزدار نێچیرڤان بارزانییه‌وه په‌یوه‌ندیمان به برای ئه‌م خاتوونه‌وه كردووه، كه ماوه‌ی 3 ساڵه دیلی ده‌ست چه‌ته‌كانی داعشه .
كه‌ركوكی ده‌شڵێ: بڕیار وایه پێش نیوه‌رۆی ئه‌مڕۆ كه‌س و كاری كچه‌كه بگه‌نه لای ئێمه، بۆ ئه‌وه‌ی به كچه‌كه‌یان شادببنه‌وه .
كوردستان تیڤی: داستان ئه‌میر
کۆمێنت (0)
تا ئێستا هیچ کۆمێنتێک نەکراوە.