ئەندریا پێرلۆی ئەستێرەی تۆپی پێی ئیتاڵیا و یانەی نیۆیۆڕك سیتی ئەمەریكی بڕیاری وازهێنانی یەكجاری لە یاریكردنی تۆپى پێ دا.
پێرلۆ لە چاوپێكەوتنێكدا بۆ رۆژنامەی (لاگازیتا دیلۆ سپۆڕت)ی ئیتاڵی گوتی: لە كانوونی دووەمی داهاتوودا گرێبەستەكەم لەگەڵ یانەی نیۆیۆرك سیتی تەواو دەبێت و ئەو كاتەش باشترین كاتە بۆ وازهێنانی یەكجاری لە یاریی تۆپی پێدا.
پێرلۆى 38 ساڵ، زیاتر گوتی: چیتر تەمەن رێگەم پێنادات لە یاریكردن بەردوام بم و رۆژانە بەهۆی یاریكردن و مەشق و راهێنانەوە تووشی كێشەی توانای جەستەیی و پێكان دەبمەوە، بۆیە پێموایە كاتی ئەوە هاتووە بەیەكجاری لە تۆپی پێ دوور بكەومەوە.
پێرلۆ بەیەكێك لە یاریزانە هەر سەرەكەوتووەكانی ئیتاڵیا و یانەكانی میلان و یۆڤانتۆس دادەنرێ و لە ماوەی ژیانی وەرزشیدا چەندان دەستكەوتی گەورەی بەدەستهێناوە، لە ساڵی 2015وەش لە خولی تۆپی پێی ئەمەریكا و لە ریزی یانەی نیۆیۆڕك سیتی یاریی دەكات.
كوردستان تیڤی/ رفعت مزورى
کۆمێنت (0)
تا ئێستا هیچ کۆمێنتێک نەکراوە.