دەزگای خێرخوازیی بارزانی کاروانێکی دیکەی ھاوکارییەکانی گەیاندە ئاوارەکان لە شنگال و لەم چالاکییەیدا پێنج ھەزار خێزانی ئاوارە بە ھەماھەنگیی وەزارەتی کۆچ و کۆچبەرانی عێراقی لە کۆمەڵگەکانی (خانەسور دگورێ) و شارەدێی (سنونێ) سوودمەند دەبن.
ئەم چالاکییە سێیەمین چالاکیی دەزگای خێرخوازیی بارزانییە لە ماوەی ھەفتەیەکدا کە لە شنگال بەڕێوەی دەبات و لە کۆی ھەر سێ چالاکییەکە 13 ھەزار ئاوارە پێداویستیی خۆراکییان پێشکەش کراوە.
دەزگای خێرخوازیی بارزانی، ھاوکاریی جۆراوجۆر بە ھەماھەنگیی ڕێکخراو و ناوەندە جیھانی و ناوچەییەکان پێشکەشی ئاوارە و پەنابەران دەکات، تەنیا لە ماوەی مانگی نۆدا ھاوکاریی خۆراکی پێشکەشی 105 ھەزار و 336 خێزان کردووە.
ھەروه‌ها دوێنێ سێشەممەش، دەزگای خێرخوازیی بارزانی لە سێکتەری پەروەردەدا قوتابخانە بنەڕەتییەکانی نۆ گوند لە سنووری ئیدارەی گەرمیاندا بەسەر کردەوە، جانتا و پێداویستیی خوێندنی پێشکەشی 314 قوتابی کرد.
قوتابییانی پۆلەکانی یەک تا شەشی بنەڕەتی لە گوندەکانی (پیازە جار، سماق، سەید جەژنی، فەتاح عومەر، کانی ماران، کۆڵەجۆی حەمەجان، کارێزەی حەمەکەیفە، کەوا چەرموو و توران شێخ سەلام) لە ھاوکارییەکانی دەزگای خێرخوازیی بارزانی سوودمەند بوون.
كوردستان تیڤی/ رفعت مزورى
کۆمێنت (0)
تا ئێستا هیچ کۆمێنتێک نەکراوە.