پاشنیوه‌ڕۆی ئه‌مڕۆ چوارشه‌ممه 1/11/2017 به‌ڕێز نێچیرڤان بارزانی سه‌رۆك وه‌زیرانی هه‌رێمی كوردستان و شاندێكی یاوه‌ری، سه‌ردانی مامۆستا عه‌لی باپیر ئه‌میری كۆمه‌ڵی ئیسلامیی كوردستان له ئۆفێسی خۆی له هه‌ولێر كرد و له‌لایه‌ن به‌ڕێزان ئه‌میر و ئه‌ندامانی ئه‌نجومه‌نی سیاسیی كۆمه‌ڵی ئیسلامیی كوردستانه‌وه پێشوازی لێ كرا.
له دیدارێكدا ڕه‌وشی ناوچه‌كه و عیراق و هه‌رێمی كوردستان به‌گشتی و ڕووداوه‌كانی ئه‌م دواییه به‌تایبه‌تی و چۆنیه‌تیی ڕووبه‌ڕووبوونه‌وه‌ی پێشهاته‌كان و چاره‌سه‌ركردنی لێكه‌وته‌كانی، خرانه به‌ر باس. هه‌ردوولا جه‌ختیان له یه‌كڕیزیی نێوماڵی كوردستان و چاره‌سه‌ركردنی كێشه هه‌ڵواسراوه‌كانی نێوان هه‌ولێر و به‌غدا به ڕێگه‌ی دیالۆگ و گفتوگۆ و دروستكردنی باشترین په‌یوه‌ندی له‌گه‌ڵ وڵاتانی دراوسێ له‌سه‌ر بنه‌مای به‌رژوه‌ندیی هاوبه‌ش، كرده‌وه.
تاوتوێكردنی چه‌ند بابه‌تێكی په‌یوه‌ندیدار به كێشه ناوخۆییه‌كانی هه‌رێمی كوردستان و دۆخى هاووڵاتیان و په‌یڕه‌وكردنی سیاسه‌تێكی تۆكمه بۆ به‌ڕێوه‌بردنی هه‌رێم، لایه‌نێكی دیكه‌ی دیداره‌كه بوو.
کۆمێنت (0)
تا ئێستا هیچ کۆمێنتێک نەکراوە.