سه‌رۆكوه‌زیرانی به‌ریتانیا رایده‌گه‌ێنێ، بۆ پرسی سه‌ربه‌خۆیی ده‌بێ كورد له‌گه‌ڵ به‌غدا دانوستاندن بكات.
له كۆبوونه‌وه‌ی ئاسایی هه‌فتانه‌ی حكومه‌ت و په‌رله‌مانی به‌ریتانیا، تێریزا مه‌ی، سه‌رۆكوه‌زیرانی به‌ریتانیا له‌باره‌ی پرسیاری دوا پێشهاته‌كان له‌باره‌ی رووداوه‌كانی نێوانی هه‌رێمی كوردستان و حكومه‌تی ناوه‌ندی عێراق وه‌ڵامی پرسیاری جاك لۆپرێستی، په‌رله‌مانتاری پارتی پارێزگارانی دایه‌وه.
جاك لۆپرێستی به سه‌رۆكوه‌زیرانرانی وڵاته‌كه‌ی راگه‌یاند: دوای ریفراندۆمی كوردستان بۆ سه‌ربه‌خۆیی، میلیشیاكانی سه‌ر به ئێران و سوپای عێراق هێرشده‌كه‌نه سه‌ر پێشمه‌رگه، ئه‌وه‌ش به هیچ شێوه‌یه‌ك قبوڵكراوه نییه. ئه‌و په‌رله‌مانتاره داوای هه‌ڵوێستی وڵاته‌كه‌ی له‌باره‌ی خواستی دیموكراتی كورد بۆ سه‌ربه‌خۆیی كرد و داوا وه‌ڵامی له تێریزا مه‌ی كرد.
له وه‌ڵامدا تێریزا مه‌ی، سه‌رۆكوه‌زیرانی به‌ریتانیا رایگه‌یاند: له‌باره‌ی هه‌رێمی كوردستان، پێشتر پێداگیریمان كردبوو له هه‌ڵوێسته‌كانمان به‌وه‌ی كه پرسی سه‌ربه‌خۆیی ده‌بێت سه‌ركردایه‌تیی كورد له‌گه‌ڵ به‌غدا دانوستاندن بكه‌ن و ئه‌و پرسه به گفتوگۆ چاره‌سه‌ر بكرێ. بۆیه داوای ده‌ستبه‌جێی سازانی سیاسی ده‌كه‌ین. هه‌روه‌ها داوای هێوربوونه‌وه‌ی هه‌ردوولایه‌ن ده‌كه‌م بۆ ئه‌وه‌ی دیالۆگ ده‌ستپێبكات و كێشه‌كان چاره‌سه‌ر بكرێن.
رووداو
کۆمێنت (0)
تا ئێستا هیچ کۆمێنتێک نەکراوە.