میشێل عه‌ون سه‌رۆك كۆماری لوبنان رۆژی هه‌ینی رابردوو له دیدارێكدا له‌گه‌لأ وه‌لید بوخاری باڵیۆزی سعوودیا له لوبنان، داوای كرد سه‌عد حه‌ریری بگه‌ڕێته‌وه لوبنان .
ناوبراو وتیشی شێوازی ده‌ست له‌كاركێشانه‌وه‌ی سه‌عد حه‌ریری قبوڵنه‌كراوه .
هاوكاتیش ژان ئیۆ لۆدریان وه‌زیری ده‌ره‌وه‌ی فه‌ڕه‌نسا له گفتوگۆ له‌گه‌ڵ رادیۆی یۆرۆپ یه‌كدا وتی كه ئه‌و پێیوایه سه‌عد حه‌ریری سه‌رۆك وه‌زیری ده‌ست له‌كار كێشاوه‌ی لوبنان له سعوودیا سه‌ربه‌سته و هیچ جۆره رێگرییه‌كی هاتووچووی بۆ دانه‌نراوه له‌م وڵاته‌دا .
هاوكاتیش رۆیته‌رزیش له راپۆرتێكدا ئاشكرای كردووه كه دوو به‌رپرسی پله باڵای لوبنانی پشتڕاستیان كردووه‌ته‌وه سه‌عد حه‌ریری له ریازی پایته‌ختی سعوودیا زیندانیكراوه .
هه‌روه‌ها به‌رپرسێكی دیكه‌ی لوبنانی وتوویه‌تی كه حه‌ریری له ژێر گوشار و به فه‌رمانی ریاز ده‌ستی له‌كار كێشاوه‌ته‌وه و ئێستاش له سعوودیا له ماڵه‌وه به‌ندكراوه .
هه‌ر به‌گوێره‌ی رۆیته‌رز لێدوانه‌كه‌ی میشێل عه‌ون سه‌رۆك كۆماری لوبنان له دیداره‌كه‌یدا له‌گه‌ڵ باڵیۆزی سعوودیا سه‌باره‌ت به گه‌ڕانه‌وه‌ی حه‌ریری، ره‌نگدانه‌وه‌ی ئه‌و دۆخه‌یه كه ئێستا به‌سه‌ر چینی سیاسییه‌كانی لوبناندا زاڵه .
سه‌رچاوه / رادیۆی فه‌ڕه‌نسا
مه‌سعود مه‌عروف / كوردستان تیڤی
کۆمێنت (0)
تا ئێستا هیچ کۆمێنتێک نەکراوە.