ئیمانوێل ماكرۆن سه‌رۆك كۆماری فه‌ڕه‌نسا شه‌وی پێنجشه‌ممه‌ی هه‌فته‌ی رابردوو له ریازی پایته‌ختی سعوودیا دیدارێكی له‌گه‌ڵ شازاده محه‌مه‌د بن سه‌لمان جێگره‌وه‌ی پاشایه‌تی ئه‌م وڵاته ئه‌نجامدا، كه ئامانجی كه‌مكردنه‌وه‌ی ته‌نگه‌ژه‌كانی نێوان ئێران و سعوودیا بوو .
ئه‌م سه‌ردانه‌ی ماكرۆن بۆ سعوودیا له به‌رنامه‌ی كاری سه‌ردانه‌كه‌ی بۆ وڵاتانی كه‌نداو نه‌بوو، وه ناوبراو شه‌وێك پێشتر له دوبه‌ی رایگه‌یاند له‌سه‌ر رێگه‌ی گه‌ڕانه‌وه‌ی بۆ پاریس له ریاز داده‌به‌زێت .
قه‌یرانی نێوان ئێران و سعوودیا له‌م رۆژانه‌ی دواییدا په‌ره‌ی سه‌ندووه و ته‌نانه‌ت لوبنانیشی گرتووه‌ته‌وه، به‌جۆرێك كه سه‌عد حه‌ریری سه‌رۆك وه‌زیرانی لوبنان، تاران و حزبوڵڵای لوبنانی ژێر هه‌ژموونی ئێرانی تاوانبار كرد به ده‌ستگرتنی ته‌واو به‌سه‌ر دامه‌زراوه‌كانی وڵاته‌كه‌یدا و به نیشانه‌ی ناڕه‌زایه‌تی ده‌ستی له‌كار كێشایه‌وه .
ماكرۆن له‌م دیداره‌دا جه‌ختی كرده سه‌ر ئه‌وه‌ی كه فه‌ڕه‌نسا بۆ به‌رپا كردنی ئاشتی، خۆی به به‌رپرسیار ده‌زانێت و له به‌شێكی گفتوگۆكانیدا له‌گه‌لأ ئه‌م شازاده سعوودیه هێرشی موشه‌كی حوسییه‌كانی نزیك له ئێرانی بۆسه‌ر سعوودیا ئیدانه كرد و یه‌كگرتوویی خۆی له‌گه‌ڵ ئه‌م وڵاته دووپات كرده‌وه .
جیا له‌مانه ماكرۆن وتیشی به له‌به‌رچاو گرتنی په‌یوه‌ندی توندتۆڵی نێوان فه‌ڕه‌نسا و سعوودیا، به‌لای منه‌وه گرنگه كه بۆ به‌رقرار كردنی ئاسایش له ناوچه‌كه‌دا هاوكاریی بكه‌م .
سه‌رچاوه / رادیۆی فه‌ڕه‌نسا
مه‌سعود / كوردستان تیڤی
کۆمێنت (0)
تا ئێستا هیچ کۆمێنتێک نەکراوە.