دوای سه‌ركه‌وتنه‌كانی ئه‌مدواییه‌ی هێزه‌كانی ژێر پشتیوانی رووسیا و راگه‌یاندنی سه‌ركه‌وتن له‌لایه‌ن سوپای سووریاوه به‌سه‌ر داعشدا، زۆرێك سه‌رچاوه‌ی ئاگادار باس له نزیكبوونه‌وه‌ی واشنتن و مۆسكۆ ده‌كه‌ن سه‌باره‌ت به رێككه‌وتن له‌سه‌ر كۆتاییهێنان به جه‌نگی ناوخۆی سووریا .
به‌گوێره‌ی هه‌واڵێكی ئاسۆشێیتد پرێس كه له‌سه‌ر زاری چوار به‌رپرسی ئه‌مریكی نووسیویه‌تی، ئه‌و رێككه‌وتنه ئه‌گه‌ر بكرێت له‌سه‌ر سێ بنه‌مای سه‌ره‌كی ده‌بێت كه بریتین له: خۆ پاراستن له پێكدادانی هێزه‌كانی ئه‌مریكا و رووسیا، كه‌مكردنه‌وه‌ی توندوتیژیی له جه‌نگی ناوخۆییدا، به‌هێزكردنه‌وه‌ی دووباره‌ی دانووستانه‌كانی ئاشتییانه‌ی سووریا به میوانداریی رێكخراوی نه‌ته‌وه یه‌كگرتووه‌كان .
ئه‌و چوار به‌رپرسه ئه‌مریكییه كه نه‌یانتوانی سه‌باره‌ت به ئه‌گه‌ری رێككه‌وتنه‌كه قسه‌ی زیاتر بكه‌ن و نه‌یانویست ناویان ئاشكرا بكرێت، ئه‌وه‌شیان وت كه ئه‌گه‌ر ئه‌م رێككه‌وتنه بكرێت، ئه‌وا چاوه‌ڕوان ده‌كرێ دۆناڵد ترامپی سه‌رۆك كۆماری ئه‌مریكا و ڤلادیمیر پۆتین سه‌رۆك كۆماری رووسیا له رۆژی هه‌ینیدا ئه‌م رێككه‌وتنه رابگه‌یه‌نن .
سه‌رچاوه / ده‌نگی ئه‌مریكا
مه‌سعود / كوردستان تیڤی
کۆمێنت (0)
تا ئێستا هیچ کۆمێنتێک نەکراوە.