سه‌رۆك ئه‌ركانی هاوبه‌شی هێزه‌كانی به‌رگریی ئیسڕائیل له یه‌كه‌م دیداریدا له‌گه‌ڵ ده‌زگایه‌كی راگه‌یاندنی سعوودیا وتی وڵاته‌كه‌ی ئاماده‌یه له دژی ئێران ئاڵوگۆڕی زانیاری ئه‌منیی بكات له‌گه‌ڵ سعوودیا له‌كاتێكدا كه ئیسڕائیل و سعوودیا په‌یوه‌ندیی دیپلۆماسییان به‌شێوه‌ی فه‌رمی نییه .
گادی ئایزنكۆت پێنجشه‌ممه‌ی رابردوو له دیمانه‌یه‌كی كه‌م وێنه‌دا له‌گه‌ڵ ماڵپه‌ڕی ئیلافی سعوودیا وتی، ئیسڕائیل ئاماده‌یه له هه‌وڵێكی هاوبه‌شدا له‌گه‌ڵ وڵاتی سعوودیا زانیارییه ئه‌منییه‌كانی خۆی ده‌رباره‌ی ئێران ئاڵوگۆڕ بكات .
ژه‌نه‌راڵ ئایزنكۆت له دیمانه‌یه‌كدا له‌گه‌لأ ماڵپه‌ڕی ئیلاف كه بنكه‌كه‌ی له له‌نده‌نه، جه‌ختیشی كرده‌وه كه ئۆرشه‌لیم و ریاز سه‌باره‌ت به‌وه‌ی ئێران گه‌وره‌ترین هه‌ڕه‌شه‌یه له‌سه‌ر ناوچه‌كه، كۆده‌نگیی ته‌واویان هه‌یه .
ئه‌م به‌رپرسه ئه‌منییه‌ی ئیسڕائیل ئه‌وه‌شی وت كه هه‌رچه‌نده ئێران هه‌وڵده‌دات ئاژاوه بنێته‌وه، به‌ڵام وڵاته‌كه‌ی مه‌یلی له‌وه نییه كه جه‌نگ له‌گه‌ڵ حزبوڵڵای تیرۆریستی بكات كه له ژێر چه‌تری پشتیوانیی ئێراندایه .
هه‌روه‌ها ئایزنكۆت ئه‌وه‌شی دركاند كه ئیسڕائیل ئاماده‌یه تا ئه‌زموونه‌كان و زانیارییه‌كانی خۆی ئاڵوگۆڕ پێبكات له‌گه‌ڵ وڵاته عه‌ره‌به میانڕه‌وه‌كان به مه‌به‌ستی به‌ره‌نگاربوونه‌وه‌ی ئێران .
سه‌رچاوه / ده‌نگی ئه‌مریكا
مه‌سعود / كوردستان تیڤی
کۆمێنت (0)
تا ئێستا هیچ کۆمێنتێک نەکراوە.