له چه‌ند رۆژ له‌مه‌وپێشه‌وه ژێرده‌ریاییه‌كی سه‌ربازیی ئه‌رژه‌نتینی به 44 سه‌رنشینه‌وه له ئاوه‌كانی باشووری زه‌ریای ئه‌تڵه‌سی ونبووه .
چه‌ندین فڕۆكه و كه‌شتیی جه‌نگیی ئه‌رژه‌نتینی و هه‌روه‌ها فڕۆكه‌یه‌كی ناسا له رۆژی هه‌ینییه‌وه له كه‌ناراوه‌كانی نزیك ئه‌رژه‌نتین ده‌ستیان به گه‌ڕان و پشكنینیان كردووه .
به‌گوێره‌ی وته‌بێژی سوپای ئه‌م وڵاته تا ئێستا 20% ئه‌و كه‌ناراوانه پشكێنراون، به‌ڵام سه‌ره‌ڕای ئه‌وه‌ش بارودۆخی ناله‌باری كه‌شوهه‌وا، دۆزینه‌وه‌ی شوێن پێی ژێرده‌ریاییه‌كه‌ی ئه‌سته‌م كردووه .
دوایینجار كه په‌یوه‌ندیی كراوه به ژێرده‌ریایی ئارا سان خوان، كاتژمێر حه‌وت و سیی خوله‌كی سه‌رله‌به‌یانیی رۆژی چوارشه‌ممه‌ی هه‌فته‌ی رابردوو به كاتی ناوچه‌كه بووه .
هێزی ده‌ریایی ئه‌رژه‌نتین بۆ دۆزینه‌وه‌ی ژێرده‌ریاییه‌كه دوو گریمانه‌ی داناوه، یه‌كه‌م ئه‌وه‌یه كه ئه‌گه‌ر سیسته‌می په‌یوه‌ندیكردنی ژێرده‌ریاییه‌كه پچڕابێت، ته‌نیا ئه‌وه‌نده پێویسته كه ئاراسته‌ی هاتنه‌وه‌ی ژێرده‌ریاییه‌كه به‌ره‌و بنكه‌ی سه‌ره‌كیی بپشكنن .
گریمانه‌ی دووه‌میش ئه‌وه‌یه كه ئه‌گه‌ر مه‌كینه‌كه‌ی له‌كار كه‌وتبێت و له رێگه‌ی خۆی لایدابێت، ده‌بێت ئاراسته‌ی با و ره‌وته‌كانی ئاو بكرێن به بنه‌مای گه‌ڕان و پشكنینه‌كان .
پاپا فرانسیس رێبه‌ری كاسۆلیكه‌كانی جیهان كه به ره‌گه‌ز ئه‌رژه‌نتینییه، له په‌یامێكدا رایگه‌یاندووه كه بۆ رزگاریی سه‌رنشینه‌كانی ئه‌و ژێرده‌ریاییه نزا ده‌كات .
سه‌رچاوه / رادیۆ فه‌ڕه‌نسا
مه‌سعود / كوردستان تیڤی
کۆمێنت (0)
تا ئێستا هیچ کۆمێنتێک نەکراوە.