كۆشكی سپیی رایگه‌یاندووه كه سه‌رۆك كۆماری ئه‌م وڵاته و هاوتا فه‌ڕه‌نسییه‌كه‌ی رۆژی شه‌ممه‌ی ئه‌م هه‌فته‌یه ده‌رباره‌ی بارودۆخی لوبنان و سووریا گفتوگۆیان كردووه و سه‌باره‌ت به به‌ره‌نگاربوونه‌وه له‌به‌رامبه‌ر كرده‌وه‌ی تێكده‌رانه‌ی ئێران و حزبوڵڵای لوبنانیش رێككه‌وتوون .
كۆشكی سپیی ئه‌وه‌شی راگه‌یاندووه كه دۆناڵد ترامپی سه‌رۆك كۆماری ئه‌مریكا و ئیمانوێل ماكڕۆن هاوتا فه‌ڕه‌نسییه‌كه‌ی رێككه‌وتون له‌سه‌ر ئه‌وه‌ی كه پێویسته هاوكاریی هاوپه‌یمانانی ناوچه‌كه بكه‌ن به مه‌به‌ستی به‌ره‌نگاربوونه‌وه له به‌رامبه‌ر كرده‌وه‌ی تێكده‌رانه و گێره‌شێوێنانه‌ی ئێران و حزبوڵڵای لوبنان .
ئاژانسی هه‌واڵی فه‌ڕه‌نسا رایگه‌یاندووه كه ماكڕۆن هه‌روه‌ها له‌گه‌ڵ سه‌رۆك كۆماری میسڕ و جێگری پاشایه‌تی سعوودیا و سكرتێری گشتیی نه‌ته‌وه یه‌كگرتووكان به ته‌له‌فۆن سه‌باره‌ت به بارودۆخی رۆژهه‌ڵاتی ناوه‌ڕاست قسه‌یان كردووه .
به‌یاننامه‌كه‌ی كۆشكی سپیی له‌سه‌ر ئه‌م رێككه‌وتنه‌ی سه‌رۆك كۆماری ئه‌مریكا و فه‌ڕه‌نسا له‌كاتێكدا راگه‌یه‌نراوه كه سه‌عد حه‌ریری سه‌رۆك وه‌زیرانی لوبنان له سعوودیاوه رۆیشتووه‌ته فه‌ڕه‌نسا و له پاریس دیداری له‌گه‌ڵ ماكرۆن كردووه و بڕیاره به‌مزووانه بگه‌ڕێته‌وه وڵاته‌كه‌ی .
پاریس له‌م چه‌ند حه‌فته‌یه‌ی دواییدا ره‌خنه‌كانی له ئێران توندتر كردووه، له به‌رامبه‌ریشدا به‌رپرسانی كۆماری ئیسلامیی ئێران ره‌خنه‌ی توندیان له ناوبراو گرتووه .
جێگه‌ی ئاماژه‌یه كه پێنجشه‌ممه‌ی رابردوو ژان ئیۆن لۆدریان وه‌زیری ده‌ره‌وه‌ی فه‌ڕه‌نسا له‌كاتی دیدار له‌گه‌ڵ هاوتا سعوودییه‌كه‌ی، وتی كه وڵاته‌كه‌ی نیگه‌رانی ده‌ستوه‌ردان و ئامانجه‌كانی به‌رژه‌وه‌ندی خوازانه‌ی ئێرانه له ناوچه‌كه‌دا .
سه‌رچاوه / رادیۆ فه‌ردا
مه‌سعود / كوردستان تیڤی
کۆمێنت (0)
تا ئێستا هیچ کۆمێنتێک نەکراوە.