حزبی شیوعیی كوردستان لەبارەی بڕیاری دادگای فیدڕاڵی هەڵوێستی خۆی ڕاگەیاند و ئاماژەیان بەوەكرد كە بڕیاری ریفراندۆم دەربڕی ئیرادەی گەلی كوردستانە و بە هیچ هێزیكی ناوخۆی و دەرەكی هەڵناوەشێتەوە.
لە راگەیەندراوی مەكتەبی سیاسی حزبی شیوعی كوردستان ھاتووە: لە کاتێکدا ریفراندۆمێك کە زیاتر لە 3 ملیون دەنگی هێنابێ و لە دەستووریشدا هیچ بەربەستێك نەبێ لە رێگای ئەنجامدانیدا، رەنگدانەوەی ئەوەیە کە گەل سەرچاوەی هەموو دەسەڵاتەکانە و دەسەڵاتی گەلی کوردستان لە بڕیاری شێواوی دادگای ئیتحادی بەهێزترە ، دادگایەک کە لە 2004 دروست کراوە، دەبوایە دوای بڕیاردانی دەستوور لە 2005 قانونێکی نوێ بۆ دادگای دەستووری و پێکهاتەیەکی نوێ دادگای دەستووری دابنرێ، هەر بۆیە ئەوەی پێویستی بە هەڵوەشاندنەوە هەیە و کە نادەستوورییە خودی دادگای ئیتحادییە نەك ریفراندۆم.
دەقی بەیاننامەی حزبی شیوعی کوردستان
رۆژی 20 تشرینی دووەمی 2017 وەک کارێکی چاوەڕوانکراو، دادگای ئیتحادی لە بەغدا بریارێکی دەرکردوە کە ریفراندۆمی گەلی کوردستان لە 25ی ئەیلولی 2017 نادەستورییە و هەر هەنگاوێکیش بۆ ئەم مەبەستە نرا بێت هەڵدەوەشێنرێتەوە. ئەم بریارەی دادگای ئیتحادی دوای ئەو بریارە دێت کە تەفسیری ماددەی یەکەمی دەستور بێ خۆ ماندوو بوون بە تەفسیرکردن، دەکات و لە دەرئەنجامیدا داواکردنی سەربەخۆیی هەر پێکهاتەیەک بە نادەستوری دەزانێت و تەنها ئاماژە دەکات کە لە دەستوردا هیچ دارشتنێک نییە بوار بە جیابونەوە بدات لە کاتێکدا ئەگەر دوور لە مەبەستی سیاسی و لە چوارچیوەی قانوندا دادگای ناوبراو خۆی بە تەفسیرکردن خەریک بکردایە روونە دەستور باس لە وە دەکات کە جێَبەجێکردنی دەستور زامنی یەکپارچەیی عێراقە کە دوای 13 ساڵ جێبەجێنەکراوە.بەڵام ئاشکرابوو کە مەبەست لە بریاری یەکەم رێگاخۆشکردنە بۆ بریاری نادەستوری ریفراندۆم کە ئەمرۆ ئەو دادگایە وەریگرتوە.
لێرەدا ئەرکی ئێمە باسکردنی وەزعی دادگای ئیتحادی نییە کە پێش دوو ساڵ جەماوەری خەڵکی بەغدا وناوەراست وباشوری عێراق نەک خەڵکی کوردستان داوای هەڵوەشاندنەوەی ئەم دادگایەیان دەکرد و تومەتی گەندەڵی و دوورکەوتنەوە لە بنەمای داد و ملکەچبوونی بە بریاری سیاسییان دەدایە پاڵی لە چوارچێوەی هەڵمەتی روووبەرووبونەوەی گەندڵی و چاکسازی لە سیستمی دادوەری، بەڵام ئەوەی کە پەیوەندی بە چەمکی ریفراندۆمی گەلی کوردستانەوە هەیە، ئەو دادگایە دوور لە کاری پیشەیی، خۆی خزاندە هەڵویستی دامودەزگاکانی دیکەی حکومەتی عێراق کە چەندین سزای جۆراجۆری بەسەر کوردستاندا سەپاندوە، بێ ئەوەی بیر لەوە بکاتەوە کە ئایا سەرجەم هەڵوێستەکانی حکومەت و پەرلەمانی عێراق دژ بە کوردستان بە پێی دەستور بووە! ئایا دەکرێت ئەم بابەتە بەم شێوە یەکلایەنییە بریاری لە سەر وەرگیرێت و مامەلە لە گەڵ ئەم بابەتە بە شێوەیکی هەڵبژاردەی دابڕاو لە سەرجەم ماددەکانی دەستور، بکرێت!
دادگای ئیتحادی چاوپۆشی لە سەرجەم پێشێلکردنەکانی دەستور دەکات بێ ئەوەی فزەی لێوە بێت بەڵام سەبارەت بە بابەتێکی گرنگ کە پەیوەندی بە پرنسپەکانی دەستور و چەمکی خودی فدرالیەتەوە هەیە کە ماناکەی یەکێتییەکی ئارەزومەندانەیە نەک یەکێتییەکی زۆرەملێ ، بریارێکی سیاسی وەردەگرێت کە لە دەسەڵاتی ئەو دادگایە نییە، لە کاتێکدا ریفراندۆمێک کە زیاتر لە 3 ملیون دەنگی هێنابێ و لە دەستوریشدا هیچ بەربەستێک نەبێ لە رێگای ئەنجامدانیدا، رەنگدانەوەی ئەوەیە کە گەل سەرچاوەی هەموو دەسەڵاتەکانە و دەسەڵاتی گەلی کوردستان لە بریاری شێواوی دادگای ئیتحادی بەهێز ترە ، دادگایەک کە لە 2004 درووست کراوە و دەبوایە دوای بریاردانی دەستور لە 2005 قانونێکی نوێ بۆ دادگای دەستوری و پێکهاتەیەکی نوێ دادگای دەستوری دابنرێ، هەر بۆیە ئەوەی پێویستی بە هەڵوەشاندنەوە هەیە و کە نادەستورییە خودی دادگای ئیتحادییە نەک بر یاری ریفراندۆم.
بریاری ریفراندۆم کە دەڕبڕی ئیرادەی گەلی کوردستانە بە هیچ هێزیکی ناوخۆی و دەرەکی هەڵناوەشێتەوە، وتەنانەت نە پەرلەمانی کوردستان و نەحکومەتی هەرێمیش ماف و توانای هەڵوەشاندنەوەی ئەو بریارەی نییە، کە بۆتە بەڵگەنامەیەکی مێژووی نەک بە مانای بەشێک لە رابووردوو، بەڵکو بەڵگەنامەیەکی مێژووی و قانونی لە سەر ئاستی ناوخۆو نێودەوڵەتی بۆ ئایندەی گەلی کوردستان.
گەلی کوردستان بە یەکریزی توانای تێپەرکردنی ڕەوشی ئێستای هەیە و پێویستە ئەم یەکریزییە لە بەریوبردنی حوکمی کوردستان و دانوستان لە گەڵ بەغداو مامەڵەکردن لە گەڵ هۆکاری نێودەوڵەتی بەرجەستە بێت، و گەلەکەشمان مافی خۆیەتی بە هەموو شێوازێکی دیموکراسیانە و مەدەنی نارەزایی خۆی سەبارەت بەم بریارەی دادگای ئیتحادی دەڕبرێت.
مەکتەبی سیاسی
حزبی شیوعی کوردستان
کۆمێنت (0)
تا ئێستا هیچ کۆمێنتێک نەکراوە.