پەرلەمانی کوردستان هاوخەمی بۆ قوربانیانی بومەلەرزە گەیاندە کونسوڵخانەی ئێران

شانديَكى پەرلەمان سەردانی کونسوڵی ئێرانیان لە هەولێر کرد

جێگری سەرۆکی پەرلەمانی کوردستان، بە یاوەریی سکرتێری پەرلەمان سەردانی کونسووڵی ئێرانیان لە هەولێر کرد و هاوخەمیی پەرلەمانی کوردستانیان بۆ قوربانیانی بومەلەرزە گەیاندە کونسووڵی ئێران.

بە مەبەستی گەیاندن و دەربڕینی هاوخەمی بۆ قوربانییانی بوومەلەرزەكەى كرماشان و سەرپێلی زەهاو و ناوچەكانی تر لە كۆمارى ئیسلامیی ئێران، ئەمڕۆ چوارشەممە ٢٢/١١/٢٠١٧، (د. جەعفەر ئیبراهیم ئێمینكی)، جێگری سەرۆكی پەرلەمانی كوردستان، بە یاوەریی خاتوو (بێگەرد تاڵەبانی)، سكرتێری پەرلەمانی كوردستان و ژمارەیەك لە ئەندامانى پەرلەمان و ڕاوێژكارانی پەرلەمانی كوردستان سەردانی كونسووڵخانەی ئێرانیان لە شاری هەولێر كرد.

لەو سەردانەدا جێگری سەرۆكی پەرلەمانی كوردستان، پرسە و هاوخەمیی خۆی و پەرلەمانی كوردستانى سەبارەت بە قوربانییانی بوومەلەرزەكەى هەفتەی ڕابردوو، كە بەشێكی زۆرى شار و شارۆچكەكانى هەرێمی كوردستان و عێراق و كۆمارى ئیسلامیی ئێرانی گرتەوە، گەیاندە كونسووڵخانەی ئێران و ڕایگەیاند: ''تەواوی قوربانیانی بوومەلەرزەكە ئاماژەیەكی ڕوونە بۆ گەورەیی كارەساتەكە بەتایبەتی لە ئێران، كە بووە هۆی گیانلەدەستدان و برینداربوونی خەڵكێكى زۆر لە هاووڵاتییانی سڤیل.''

هەر لەو سەردانەدا جێگرى سەرۆكی پەرلەمان، باسی هەرێمی كوردستانیشى كرد كە بێبەش نەبوو لەو ڕووداوە و زەرەر و زیانەكانی ئەو بوومەلەرزەیە و هیوای خواست كە گیانی قوربانییانی بوومەلەرزەكە بە بەهەشت شاد بێت و هیوای زوو چاكبوونەوەشی بۆ بریندارەكان خواست.

لەبەرامبەردا كونسووڵی ئێران لە شاری هەولێر، سوپاس و پێزانینی خۆی بۆ ئەو سەردانە دەربڕی و باسی لە پەیوەندیی مێژووییی نێوان هەرێمی كوردستان و كۆمارى ئیسلامیی ئێران كرد و هیوای خواست كە پەیوەندییەكان زیاتر بەرەوپێشەوە بچن.