د. شیرین فواد مه‌عسووم ده‌ڵێت، به داخه‌وه كه له‌م چه‌ند ساڵه‌ی دواییدا (سه‌رۆك بارزانی) كه له‌سه‌ر ئاستی نێوده‌وڵه‌تی پێشوازیی سه‌رۆكی لێ ده‌كرا، حزبه‌كان پشتیوان و ده‌ستباری نه‌بوون تا كورد بگه‌یه‌نێ به ئامانجی خۆی كه سه‌ربه‌خۆییه.
د. شیرین فواد مه‌عسووم، كه پسپۆڕییه‌كه‌ی له پێوه‌ندییه‌كانی ئه‌مه‌ریكا - كورده، ڕه‌تیشی ده‌كاته‌وه كه له ستراتیژی ئه‌مه‌ریكا له ناوچه‌كه به‌رانبه‌ر به كورد، هاوپه‌یمانه‌تی و پشتیوانییه‌كی جیددی بوونی هه‌بووبێ، تا له بڕیارێكی چاره‌نووسسازی وه‌ك ڕاپرسی بۆ سه‌ربه‌خۆیی پشتی له كورد كردبێ.
ئه‌و ده‌ڵێت، ئه‌مه‌ریكا له ناوچه‌كه‌دا جێی به به‌ریتانیا له‌ق كرد و ئێستایش داكۆكی له به‌رژه‌وه‌ندییه‌كانی خۆی ده‌كات. سه‌ره‌كیترین خواستی وڵاتانی زلهێزیش له ڕۆژهه‌ڵاتی نێوه‌ڕاستدا ئه‌وه‌یه كه سه‌قامگیری هه‌بێ تا به‌رژه‌وه‌ندییه‌كانیان پارێزراو بن.
د. شیرین كه كچی سه‌رۆك كۆماری عێراقه و له به‌ریتانیا نیشته‌جێیه، ڕه‌تیشی كرده‌وه كه راوێژكاری سه‌رۆك كۆمار بێ و گوتی، هیچ مووچه‌یه‌كی له عێراق و له كوردستانیش نییه. ئه‌و گوزارشت له رای خۆی ده‌كات وه‌ك ئاكادیمی و وه‌ك كوردێك و، گوتیشی، وا په‌روه‌رده كراوه كه كورد ده‌بێ سه‌ربه‌خۆییی خۆی به ده‌ست بێنێ و ده‌وڵه‌تی خۆی هه‌بێ.
ئه‌و پسپۆڕه‌ی پێوه‌ندییه‌كانی ئه‌مه‌ریكا - كورد جه‌خت ده‌كاته‌وه، بۆ ئه‌وه‌ی گه‌لی كورد بگا به ئامانجی خۆی، ده‌بێ یه‌كگرتوو بن، یه‌ك سه‌رۆكیان هه‌بێ و له نێوخۆ و له‌سه‌ر ئاستی نێوده‌وڵه‌تییش گوزارشت له خواست و ئیراده‌ی كوردستانیان بكات.
د. شیرین فواد مه‌عسووم ڕاشكاوانه ده‌ڵێت، ئێستایشی له‌گه‌ڵدا بێ، (سه‌رۆك بارزانی) كه‌سێكی ''مه‌قبوول''ه له‌سه‌ر ئاستی ناوچه‌كه و نێوده‌وڵه‌تی، كه ئه‌گه‌ر بێتو لایه‌نه سیاسییه كوردستانییه‌كان پاشقوڵ له یه‌كدی نه‌گرن و، هه‌ریه‌كه‌یان به دوای به‌رژه‌وه‌ندییه‌كانی خۆیانه‌وه نه‌بن و، بیریان لای ئه‌وه نه‌بێ كه كێ ده‌توانێ ده‌ست به‌سه‌ر بڕێك نه‌وتدا بگرێ و كوڕ و كه‌سوكاریان بكه‌ن به وه‌زیر و به‌رپرس، ئه‌وا ئه‌مه‌ریكا و به‌ریتانیایش پشتیوانيت ده‌بن.
ئه‌و له قسه‌كانی ئه‌مشه‌ویدا بۆ كه‌ناڵی ڕووداو، نموونه‌ی به چاره‌گی یه‌كه‌می سه‌ده‌ی رابردوو هێنایه‌وه، كاتێك به‌ریتانیا ویستی پشتی (شێخ مه‌حموودی حه‌فید) بگرێ و كوردستان ببێ به ده‌وڵه‌تێكی سه‌ربه‌خۆ، كه‌چی له‌ولاوه هۆزی جافه‌كان دژی وه‌ستانه‌وه و ئه‌مه‌ش هۆكاری سه‌ره‌كی بوو كه به‌ریتانیا له پشگیریكردنه‌كه‌ی پاشگه‌ز ببێته‌وه؛ ئاخر ئه‌وان نایانه‌وێ شه‌ڕی نێوخۆ دروست ببێ.
د. شیرین فواد مه‌عسووم گوتيشی، ئێستایش له‌م سه‌رده‌مه و پاش سه‌د ساڵ له گرفتی نێوخۆیی و نه‌بوونی یه‌كڕیزیی له نێو لایه‌نه سیاسییه‌كانی كوردستاندا، هه‌مان ئه‌و سیناریۆیه دووباره بووه‌وه.
کۆمێنت (0)
تا ئێستا هیچ کۆمێنتێک نەکراوە.