ڕاكه‌ری مه‌غریبی محه‌مه‌د مورابیتی نازناوی پێشبڕكێی ماراسۆنی بیابانی عومانی له ئاستی پیاوان به‌ده‌ستهێنا، سه‌د ڕاكه‌ری ناسراوی پیاو و ئافره‌تی بیستوشه‌ش وڵاتی جیهان له پێشبڕكێكه‌دا به‌شدار بوون.
ڕكابه‌ریه‌كانی قۆناغی شه‌شه‌م و كۆتایی پێشبڕكێكه به درێژی بیستوسێ كیلۆمه‌تر سازكرا، له‌ئه‌نجامدا محه‌مه‌د مورابیتی پله‌ی یه‌كه‌می برده‌وه‌و نازناوی پێشبڕكێكه‌ی مسۆگه‌ركرد.
پێشتریش مورابیتی نازناوی هه‌ر پێنج قۆناغه‌كه‌ی دیكه‌ی به‌ده‌ستهێنابوو، سامی سه‌عیدی عومانی پله‌ی دووه‌می به‌ركه‌وت و پله‌ی سێیه‌میش بووه به‌شی سه‌لامه ئه‌قره‌عی ئوردونی.
له ئاستی ئافره‌تانیشدا، ناتالیا سیدیخی ڕوسی پله‌ی یه‌كه‌می به‌ده‌ستهێناو پله‌كانی دووه‌م و سێیه‌میشیی بۆ هه‌ریه‌ك له عه‌زیزه ڕاجی مه‌غریبی و جۆزیا زاكری فیسكی بریتانی جێهێشت.
، جێگای باسه پێشبڕكێی ماراسۆنی عومان له ناوچه وشك و ته‌ختایی و ته‌پۆلكه بیابانیه‌كانی ئه‌و وڵاته به درێژی سه‌دوشه‌ستوپێنج كیلۆمه‌تر به‌ڕێوه‌‌چوو و به‌سه‌ر شه‌ش قۆناغی جیا دابه‌شكرابوو .
کۆمێنت (0)
تا ئێستا هیچ کۆمێنتێک نەکراوە.