لە شاری هەولێر فوئاد مەعسووم، سەرۆککۆماری عێراق لەگەڵ نێچیرڤان بارزانی، سەرۆکوەزیرانی هەرێمی کوردستان و قوباد تاڵەبانی، جێگری سەرۆکوەزیران کۆبووەوە و دۆخی کەرکووک و دەستپێکردنی گفتوگۆیان لەگەڵ حکومەتی عێراق تاوتوێکرد.
به‌ڕێز سه‌ركۆماری عیراق دووپاتی كرده‌وه كه هه‌ولێر و به‌غدا خوازیارن له ماوه‌یه‌كی نزیكدا له ڕیگه‌ی دیالۆگ و گفتوگۆیه‌كی گشتی و بونیاتنه‌ره‌وه، كێشه‌كان چاره‌سه‌ر بكه‌ن و بگه‌نه لێكگه‌یشتن و هه‌ماهه‌نگی و هه‌ڵدانه‌وه‌ی په‌ڕه‌یه‌كی نوێ به شێوه‌یه‌ك له به‌رژوه‌ندیی هه‌موو پێكهاته‌كانی گه‌لی عیراقدا بێت و ئارامی و یه‌كیتیی ڕیزه‌كان و جێبه‌جێكردنی ده‌ستوور و پێشكه‌وتن له هه‌موو بواره‌كاندا، مسۆگه‌ر بكات.
سه‌رله‌به‌یانیی ئه‌مڕۆ چوارشه‌ممه 29/11/2017 به‌ڕێزان نێچیرڤان بارزانی سه‌رۆك وه‌زیران و قوباد تاڵه‌بانى جێگرى سه‌رۆك وه‌زیرانی هه‌رێمی كوردستان، له هه‌ولێر له‌گه‌ڵ به‌ڕێز د. فوئاد مه‌عسووم سه‌ركۆماری عیراقی فیدراڵ كۆبوونه‌وه. له كۆبوونه‌وه‌كه‌دا هه‌وڵه‌كان بۆ چاره‌سه‌ركردنی ناكۆكی و كێشه هه‌ڵواسراوه‌كانی نێوان هه‌ولێر و به‌غدا و دوا پێشهاته سیاسییه‌كانی عیراق و هه‌رێمی كوردستان، گفتوگۆ كران.
لای خۆیه‌وه به‌ڕێز سه‌رۆك وه‌زیرانی هه‌رێمی كوردستان هه‌وڵه‌كانی به‌ڕێز سه‌ركۆماری عیراقی بۆ نزیككردنه‌وه‌‌ی بیروبۆچوونه‌كانی هه‌ولێر و به‌غدا به‌رز نرخاند و ئاماده‌ییی حكوومه‌تی هه‌رێمی كوردستانیشی بۆ ده‌ستپێكردنی دیالۆگ و گفتوگۆیه‌كی جددی و بنیاتنه‌ر له‌گه‌ڵ حكوومه‌تی فیدراڵ به‌مه‌به‌ستی تێپه‌ڕاندنی دۆخی ئێستا ده‌ربڕی به شێوه‌یه‌ك له به‌رژوه‌ندیی هه‌موو پێكهاته‌كانی گه‌لی عیراقدا بێت.
کۆمێنت (0)
تا ئێستا هیچ کۆمێنتێک نەکراوە.