میلیشیاکانی حه‌شدی شه‌عبی ماڵی هاووڵاتییه‌کی کوردیان له‌ خورماتوو ته‌قانده‌وه‌

كاتژمێر 1ی ئه‌مشه‌و، میلیشیاكانی حه‌شدی شه‌عبی، ماڵی هاووڵاتییه‌كی كوردیان له‌ گه‌ڕه‌كی كۆماری خورماتوو ته‌قانده‌وه‌.

به‌ گوێره‌ی زانیارییه‌كان، ئه‌و هاووڵاتییه‌ ناوی خالید فه‌ره‌جه‌ و ماڵه‌كه‌ی له‌ گه‌ڕه‌كی كۆماری شارۆچكه‌ی خورماتووه‌، دوای تاڵان كردنی له‌لایه‌ن گرووپه‌ میلیشیاكانی حه‌شده‌وه‌، ماڵه‌كه‌ی ته‌قێندرایه‌وه‌.

بەرەبەیانی رۆژی دووشەممە 16/10/2017 سوپای عێراق و میلیشیاکانی حەشدی شەعبی و حزبوڵڵای لوبنانی بە سەرپەرشتی و بەشداریی سوپای پاسدارانی ئێران ھێرشیان کردە سەر خورماتوو و کەرکووک و مەخموور و ناوچە کوردستانییەکانی ئەو سنوورە و داگیریان کردن، بەھۆی ئەو داگیرکارییەوە نزیکەی 200 ھەزار ھاووڵاتیی ئاوارەی ھەولێر و شارەکانی دیکەی کوردستان بوون.

رۆژی چوارشەممەش 18/10/2017 کۆسرەت رەسوڵ عه‌لی، جێگری سکرتێری گشتیی یەکێتی لە پەیامێکدا رایگەیاند: کە چەند کاڵفامێکی ناو حزبەکەی ئەو پیلانەیان لە دژی گەلی کوردستان جێبەجێ کرد و رایگەیاند: ئۆباڵی کارەساتەکانی کەرکوک و ھەموو زیانە گیانی و ماددی و مەعنەویەکانی تری گەلەکەمان دەکەوێتە ئەستۆی ئەو کاڵفامانەی ناو یەکێتی.

له‌ دوای راده‌ستكردنی خورماتوو و كه‌ركووك له‌ 16ی ئۆكتۆبه‌ر، ره‌وشی ئه‌منی ئه‌و ناوچانه‌ ئاڵۆز بووه‌ و تا ئێستاش به‌ ده‌یان ماڵی هاووڵاتییانی كورد سووتێنراون و ته‌قێندراونه‌ته‌وه‌.