لە داقووق تەقە لە دوو گەنج دەکرێت و یەکێکیان گیان لەدەست دەدات

لە گەڕەکی رزگاری شارۆچكه‌ی داقووق چەند چەکدارێک تەقە لە دوو گەنج دەکەن و بەهۆیەوە یەکێکیان گیان لەدەستدەدات و ئەوەی دیکەش بە سەختی بریندار دەبێت تا ئێستاش نازانرێت ئه‌و چه‌كدارانه‌ كێن .

شه‌وی رابردوو 30-11-2017 كاتژمێر 1:30 خوله‌ك چەند چەکدارێکی نەناسراو بە ئۆتۆمبێلێکی تۆیۆتا پیکاپی جام ڕەش تەقە لە دوو گەنج دەکەن به‌ ناوه‌كانی (محەممەد لەتیف زەندی) و (ریشە شەعبان) بەهۆیەوە یەکێکیان گیان لەدەستدەدات و ئەوەی دیکەش بریندار دەبێت .

هەردوو گەنجەکە دوای ئەوەی دەستڕێژی گوله‌یان لێدەکرێت و بریندار دەکرێن رەوانەی نەخۆشخانە کراون و دوای مانەوەیان بۆ ماوەی چەند کاتژمێرێک، بەداخەوە (محەممەد لەتیف زەندی) گیان لەدەست دەدات و گەنجەکەی دیکەش کە ناوی (ریشە شەعبان)ـە لە نەخۆشخانە چارەسەری بۆ دەکرێت و لەژێر چاودێری وردی پزیشکیدایە .

لەدوای رووداوەکانی 16ـی ئۆکتۆبەر رەوشی داقووق زۆر نائارامە و چەندین جار لە ڕێگەی بۆمب و هەڵکوتانە سەرماڵان و به‌تاڵان بردن و سووتاندنی ماڵه‌كانیان خەڵک ترسێندراوە و زیانی زۆر به‌ر ماڵی هاووڵاتیانی كوردی شارۆچكه‌كه‌ كه‌وتووه‌ .