به‌رێوه‌به‌ری پۆلیسی قه‌زاو ناحیه‌كانی كه‌ركوك رایده‌گه‌ێنێ، 14 ساڵه له‌كه‌ركوك ڕاوی تیرۆر ده‌كه‌م، كه‌چی ئێستا به‌پێی ماده‌ی 4 ی تیرۆر بریاری گرتنم بۆ ده‌ركراوه و ئاماده‌شم بچمه به‌رده‌م دادگا .
عه‌مید سه‌رحه‌د قادر، به‌رێوه‌به‌ری پۆلیسی قه‌زاو ناحیه‌كانی كه‌ركوك به ده‌نگی ئه‌مریكای راگه‌یاندووه: كاتی خۆی هه‌ندێك خه‌ڵك په‌لاماری دادگای دوبزیان دا، ئێمه ئیجرائاتی یاسایمان كردووه، كه‌چی ئه‌مه‌كراوه‌ته مه‌وزوع له‌سه‌رمان.
هه‌روه‌ها گوتی: بۆ ماوه‌ی 6 مانگ مۆڵه‌تم وه‌رگرتووه و له‌دوای روداوه‌كانی 16 ی مانگی 10 ه‌وه بۆ كه‌ركوك نه‌گه‌ڕاومه‌ته‌وه‌و نه‌ك جارێكیش، 100 جار ده‌چمه به‌رده‌م دادگا، هه‌موو به‌ڵگه‌و دیكۆمێنتێكم له‌به‌رده‌سته.
گوتیشی: له ساڵی 2003 ه‌وه له‌گه‌ڵ تیمه‌كانی هاوپه‌یماناندا شه‌ری تیرۆرمان كردووه و 315 كه‌س له‌وانه‌ی له‌گه‌ڵی بوون گیانیان له‌ده‌ستداوه، هه‌روه‌ها خۆشی 14 جار هه‌وڵی كوشتنی دراوه، كه‌چی ئێستا به‌پێ برگه‌ی یه‌ك له‌ماده‌ی 4 ی تیرۆر بریاری گرتنی بۆ ده‌ركراوه.
ئێستاكه عه‌مید سه‌رحه‌د قادر ،به‌رێوه‌به‌ری پۆلیسی قه‌زاو ناحیه‌كانی كه‌ركوك له‌پۆسته‌كه‌ی لابراوه و كه‌سێكی تر خراوه‌ته جێگه‌كه‌ی، له‌گه‌ڵ ناوبراویشدا بریاری گرتن بۆ ژماره‌یه‌ك ئه‌فسه‌ری تری پۆلیسی كه‌ركوك ده‌ركراوه و بریاری گرتنه‌كانیشیان له‌به‌غداوه ره‌وانه‌ی كه‌ركوك كراوه به‌مه‌به‌ستی جێبه‌جێكردن.
ئاماده‌كردنی : رزگار
کۆمێنت (0)
تا ئێستا هیچ کۆمێنتێک نەکراوە.