دامەزراوەی ئەکابس: ساڵی داهاتوو قەیرانی مرۆیی روو له‌ زیادبوون دەکات

لەگەڵ ئەوەی ساڵی 2017 بە یەكێك لە ساڵە پڕ قەیرانەكان دادەنرێت كە تیایدا چەندین رووداوی بەدوای خۆیدا هێنا، چاوەڕوان دەكرێت ساڵی 2018ش هاوشێوەی ساڵی 2017 كێشە و قەیرانەكان بەردەوام بن . 

دامەزراوەی (ئەكابس) بۆ توێژینەوە كە بارەگاكەی لە جنێفه‌ لە راپۆرتێكدا ئاشكرایكردووە، ساڵی 2018 جەنگ و برسێتی و تیرۆر لەچەند ناوچەیەكی جیهان بەردەوام دەبێت و قەیرانی مرۆیش روو له‌ زیاد بوون دەكات . 

دامەزراوەكە راپۆرتێكی بەناوی چاوپێداخشاندنی گشتی بۆ رەوشی مرۆیی جیهان بڵاوكردۆتەوە و لێكۆڵینەوەی بۆ 150 وڵاتی جیهان ئەنجامداوە و بۆی دەركەوتووە رەوشی جیهان لەساڵی 2018 لە ساڵی 2017 باشتر نابێت. 

بەپێی راپۆرتی دامەزراوەكە، ساڵی داهاتوو لەگەڵ بەردەوامی شەری ناوخۆ لە ئەفریقا و توندوتیژی و تیرۆر و قەیرانی مرۆیی لەسەرانسەری جیهان زیاتر دەبێت . 

(لارس پیتەر نیسن) بەڕێوەبەری دامەزراوەكە رایگەیاندووە" 2017 ساڵێكی خراپ بووە بۆ جیهان، پێشبینی دەكرێت ساڵی داهاتوو لەمساڵ باشتر نەبێت، بەتایبەت ساڵی داهاتوو توندوتیژی و نەبوونی ئاسایش هەریەكە لە ئەفغانستان و كۆماری كۆنگۆی دیموكرات و لیبیا و ئەسیوبیا و مالی و سۆماڵ و سوریا دەگرێتەوە. 

بەپێی راپۆرتی دامەزراوەی (ئەكابس)، ساڵی داهاتوو ئەسیوبیا رووبەڕووی برسێتی گەورە دەبێتەوە، هەروەها باكووری خۆرهەڵاتی نایجیریا و سۆماڵ و باشووری سوودان و یەمەن برسێتی تەنگیان پێ هەڵدەچنێ. 

دامەزارەوەكە هۆشداری داوە لە بڵاوبوونەوەی برسێتی لە جیهاندا و رایگەیاندووە، ساڵی داهاتوو 76 ملیۆن كەس لە 45 وڵات پێویستیان بە هاوكاری مرۆیی دەبێت و ئەوەش بەهۆی شەڕو ململانێكانەوە لە جیهاندا.