به‌پێی ڕاگه‌یاندراوێكى سه‌رۆكایه‌تى كۆمارى عێراق، فوئاد مه‌عسووم، سه‌رۆك كۆمارى عێراق له‌گه‌ڵ هه‌ردوو جێگره‌كانى نوورى مالیكی و ئه‌یاد عه‌لاوى كۆبووته‌وه‌و تێیدا داواى لێیان كردووه كه هه‌موو هه‌وڵێك بده‌ن بۆ ئه‌وه‌ى سه‌رجه‌م كێشه‌كانى نێوان به‌غداو حكوومه‌تى هه‌رێم، چاره‌سه‌ر بكرێن.
سه‌رۆك كۆمارى هه‌روه‌ها داواى گفتوگۆى به‌په‌له‌ى نێوان حكوومه‌تى فیدڕاڵ و حكوومه‌تى هه‌رێمى كوردستان كردوه به‌ئامانجى ئاساییكردنه‌وه‌ى په‌یوه‌ندییه‌كانى نێوان هه‌ردوولا، له‌سه‌ر بنه‌ماى ده‌ستوورو بڕیاره‌كانى دادگاى فیدڕاڵى به‌مه‌رجێك له‌ژێر سه‌رپه‌رشتى سه‌رۆكایه‌تی كۆمار و پشتیوانى نه‌ته‌وه یه‌كگرتووه‌كاندا بێت.
هه‌روه‌ها داواى كۆبوونه‌وه‌ى هه‌ر سێ سه‌رۆكایه‌تییه‌كه‌و سه‌ركرده و نوێنه‌رانى لایه‌نه سیاسییه‌كان و ده‌سه‌ڵاتى دادوه‌رى له نزیكترین كاتدا كردووه، بۆ ده‌ركردنى یاسای هه‌ڵبژاردنه‌كان و ئه‌نجامدانى هه‌لبژاردنى ئه‌نجومه‌نى نوێنه‌ران و ئه‌نجومه‌نى پارێزگاكان له واده ده‌ستوورییه‌كانیاندا.
هه‌روه‌ها داواشی كردووه كه بانگهێشتى سه‌رجه‌م پێكهاته‌كانى كه‌ركووك بكرێت بۆ كۆبوونه‌وه‌ى به‌په‌له به ئامانجى تاوتوێكردنى دۆخى پارێزگاكه به شێوه‌یه‌ك مافى هاوولاتییان و به‌رژه‌وه‌ندییه باڵا نیشتمانییه‌كان بپارێزرێت.
کۆمێنت (0)
تا ئێستا هیچ کۆمێنتێک نەکراوە.