حوسێن قائیدی بەرپرسی نووسینگەی رفێنراوانی کوردانی ئێزدی لە پارێزگایی دهۆک رایگەیاند، ئەمڕۆ چوارشەممە، ٧ کەسی دیکە لە کوردانی ئێزدی رزگار کران.
قائیدی راشیگهیاند'' بە هەوڵی نووسینگەکەمان و هێزە ئەمنییەکان توانیمان ٧ کەسی دیکەی کوردانی ئێزدی لە چنگ چەکدارانی داعش رزگار بکەین، کە بۆ ماوەی زیاتر لە ٣ ساڵ بوون لە دەستی ئەو رێکخراوە تیرۆرییەدا بوون.''
وەک قائیدی زانیاریی دا، دوو کچ لە تورکیا رزگار کران کە داعش بردبوونیە ئەو وەڵاتە، ٥ـی دیکەش لە سووریا رزگار کران و دواتر بە کەسوکاریان شاد کرانەوە.
بەگوێرەی دوائاماری رزگاربووان و رفێنراوان، تا ئێستا ٣٢١٩ کەس رزگار کراون و نزیکەی ٣٢٠٠ کەسیش هێشتا ڕزگار نەکراون.
لە بهروارى ٣-٨-٢٠١٤، چەکدارانی داعش دەستیان بەسە شنگالدا گرت و زیاتر لە ٦ هەزار کەس رفێنران و ٣٦٠ هەزار کەسیش ئاوارە بوون و زیاتر لە هەزار کەسیش کوژران.
کۆمێنت (0)
تا ئێستا هیچ کۆمێنتێک نەکراوە.