سەرۆک بارزانی: ڕیفراندۆم بەجێگەیاندنی ئەرک و پەیامێکی ڕاست و ڕەوا بوو

لەبارەی بارودۆخی هەرێمی كوردستان سەرۆک بارزانی تەئكیدی لە پێویستی بەڕێوەچوونی هەڵبژاردن كردەوە وەك چارەسەرێكی گونجاو بۆ چارەسەركردنی قەیرانی سیاسیی هەرێم و ئەوەیشی خستەڕوو كە پێویستە فەرهەنگی پێكەوەژیانی پێكهاتە نەتەوەیی و ئایینییەكانی هەرێمی كوردستان وەك خۆی بمێنێتەوە و بپارێزرێت و ئەرك و مافی هەموو لایەك بە یەكسانی دیاری بكرێت.

ڕۆژی شەممە 16ـی 12ـی 2017 لە شاری دهۆك سەرۆك  مەسعوود بارزانی لەگەڵ بەرپرس و كارگێڕ و ئەندامانی لق و ناوچە و ئەندامانی پارلەمان و بەرپرسانی ئیداری و سیاسیی و كەوادیری پێشكەوتووی پارتی دیموكراتی كوردستان لە دەڤەری بادینان كۆبۆوە.

لە كۆبوونەوەكەدا سەرۆك بارزانی وتەیەكی بۆ ئامادەبووان پێشكەش كرد و لە وتەكەیدا سوپاسی هەڵوێست و قوربانیدانی جەماوەری سەربەرزی دەڤەری بادینان لە شەڕی تیرۆر و بەشداریی بەرفراوانی ئەو دەڤەرەی لە پڕۆسەی ڕیفراندۆم كرد.  

سەرۆك بارزانی پێزانینی هەبوو بۆ خۆڕاگری و قوربانیدان و پابەندبوونی خەڵكی ئەم دەڤەرە بۆ پرسە نەتەوەیی و نیشتیمانییەكان و سڵاوی بۆ گیانی پاكی شەهیدان نارد و هیوای چاكبوونەوەیشی بۆ پێشمەرگە بریندارەكانی شەڕی دژی تیرۆریستانی داعش خواست.

لە درێژەی وتەكانیدا سەرۆك بارزانی تیشكی خستەسەر دوایین گۆڕانكارییە سیاسییەكان و وردەكاریی ڕووداوەكانی 16ـی ئۆكتۆبەر و قۆناغی دوای ڕیفراندۆم و هەڵوێستی كۆمەڵگەی نێودەوڵەتی و هەڵسوكەوت و پەرچەكردارەكانی حكوومەتی عێراقی بۆ ئامادەبووان شی كردەوە.

سەرۆك بارزانی وێڕای ئاماژەدان بەو هۆكارانەی كە هانی گەلی كوردستانی دا كە بڕیاری ڕیفراندۆم بدات، جەختی لەوە كردەوە كە ڕیفراندۆم بەجێگەیاندنی ئەرك و پەیامێكی ڕاست و ڕەوا بووە.

لەبارەی بارودۆخی هەرێمی كوردستانیش سەرۆك بارزانی تەئكیدی لە پێویستی بەڕێوەچوونی هەڵبژاردن كردەوە وەك چارەسەرێكی گونجاو بۆ چارەسەركردنی قەیرانی سیاسیی هەرێم و ئەوەیشی خستەڕوو كە پێویستە فەرهەنگی پێكەوەژیانی پێكهاتە نەتەوەیی و ئایینییەكانی هەرێمی كوردستان وەك خۆی بمێنێتەوە و بپارێزرێت و ئەرك و مافی هەموو لایەك بە یەكسانی دیاری بكرێت.

له‌لایه‌كی دیكه‌شه‌وه‌ هه‌ر ئه‌مرۆ به‌رێز سەرۆک مه‌سعود بارزانی لەگەڵ كەسایەتیی كۆمەڵایەتی و ڕیشسپی و پیاوماقووڵانی دەڤەری بادینان كۆبۆوە و جەختی كردەوە كە لەگەڵ حیوار و گفتوگۆ و لێكتێگەییشتندایە، بەڵام لە هەمانكاتدا گەلی كوردستان زمانی زۆرداری قبوڵ ناكات.

ڕۆژی شەممە 16ـی 12ـی 2017 لە شاری دهۆك سەرۆك مەسعود بارزانی لەگەڵ كەسایەتیی كۆمەڵایەتی و پیاوانی ئایینیی موسڵمان و مەسیحی و ئێزیدی و ڕیشسپی و پیاوماقووڵانی دەڤەری بادینان كۆبۆوە.

لە كۆبوونەوەكەدا سەرۆك بارزانی وتەیەكی پێشكەشی ئامادەبووان كرد و تێیدا سوپاس و پێزانینی خۆی ئاراستەی جەماوەری سەربەرز و تێكۆشەری كوردستان و دەڤەری بادینان كرد كە خۆڕاگرانە لەبەردەم تەحەدیاتدا وەستاون و لە شەڕی تیرۆردا قوربانییان دا و لە پڕۆسەی ڕیفراندۆمیشدا ئیرادە و هیمەت و هەوڵی خۆیان بە شێوەیەكی ئاشتییانە و دیموكراتی پێشانی هەموو جیهانیان دا. لە درێژەی وتەكەی دا سەرۆك بارزانی ڕۆشنایی خستەسەر بایەخی ڕیفراندۆم و بە ڕووداو و دەستكەوتێكی گرنگی گەلی كوردستان هەژماری كرد.

سەرۆك بارزانی باسی لەوەیش كرد كە ڕیفراندۆم سەرچاوەی كێشەكانی ئێستا نییە بەڵكو سەرچاوەی كێشەكان بۆ ئەو هۆكارانە دەگەڕێتەوە كە هانی گەلی كوردستانی دا بڕیاری ڕیفراندۆم بدات.

سەرۆك بارزانی باسی لە پڕۆسەی سیاسیی عێراقی لە ساڵانی ڕابردوو و ئێستا كرد كە تێیدا بە ئاشكرا شەراكەت و تەوازون و تەوافوق پێشێل كرا و هەر ئەوانەی كە ئێستا بوونەتە بەرگریكاری دەستوور و بە مەیلی خۆیان دەستوور تەفسیر دەكەن پێشێلكاری دەستووری عێراق بوونە و هۆكاری ئەو بارودۆخە نالەبارن كە لە عێراقدا هەیە.

هەر لەو كۆبوونەوەیە سەرۆك بارزانی وردەكارییەكانی خیانەتەكەی 16ـی ئۆكتۆبەری بۆ ئامادەبووان شی كردەوە و تیشكی خستەسەر هەڵوێستی كۆمەڵگەی نێودەوڵەتی و كاردانەوەكانی بەغدا لە بەرانبەر ڕیفراندۆم.

سەرۆك بارزانی جەختی لەوەش كردەوە كە لەگەڵ حیوار و گفتوگۆ و لێكتێگەییشتندایە بەڵام لە هەمانكاتدا گەلی كوردستان زمانی زۆرداری قبوڵ ناكات، داوایشی كرد كە ئومێد و ئیرادەیان بەهێز بێت و دەبێ ئەو سەروەرییانەی گەلی كوردستان لە مێژوو و خەباتی خۆی تۆماری كردووە بە باشی بپارێزرێت و توندوتۆڵتر بكرێت بە تایبەت لە بابەتی فەرهەنگی پێكەوەژیان و قووڵتركردنی گیانی برایەتی و ئازادی و یەكسانیی نێوان پێكهاتە ئایینی و نەتەوەییەكانی كوردستان.