ئێواره‌ی رۆژی یه‌كشه‌ممه كاره‌بای قه‌ره‌باڵغترین فڕۆكه‌خانه‌ی نێوده‌وڵه‌تی جیهان، هارتس فێلد جه‌كسۆن له شاری ئه‌تله‌نتای ئه‌مریكا پچڕا و بووه هۆی وه‌ستانی فڕینی سه‌دان فڕۆكه و گواستنه‌وه و نیگه‌رانی هه‌زاران گه‌شتیاری له تاریكایی ناو فرۆكه‌خانه لێكه‌وته‌وه.
فرۆكه‌خانه‌ی هارتس فێڵد جه‌كسۆن، رۆژانه 250 هه‌زار كه‌س رووی تێده‌كات و 2500 گه‌شتی ئه‌سمانی له‌و فرۆكه‌خانه‌یه ئه‌نجام ده‌درێت.
به‌رێوه‌به‌رایه‌تی كاره‌بای ویلایه‌تی جۆرجیا رایگه‌یاند، له وانه‌یه شۆرتی كاره‌با له نهۆمی ژێر زه‌وی و له ناو سیسته‌می كاره‌با هۆكاری پچڕانی ته‌زووی كاره‌با بێت.
لای خۆیه‌وه به‌ڕێوه‌به‌ری شاره‌وانی ئه‌تله‌نتا وێرای پوزش هێنانه‌وه له گه‌شتیاران، رایگه‌یاند كه لێكۆلینه‌وه به‌رده‌وامه له‌م رووداوه.
دره‌نگانی شه‌و ته‌زووی كاره‌با بۆ ناو فرۆكه‌خانه گه‌ڕاوه، به‌ڵام تا ئه‌مڕۆ دووشه‌ممه گه‌شتی ئاسمانی له‌ناو فڕۆكه‌خانه‌ی هارتس فێلد جه‌كسۆن ده‌ستی پێنه‌كردۆته‌وه.
کۆمێنت (0)
تا ئێستا هیچ کۆمێنتێک نەکراوە.