هێزه‌كانی 70ی پێشمه‌رگه‌ی سه‌ر به یه‌كێتی رایده‌گه‌ێنێن، ناحه‌زانی گه‌له‌كه‌مان له هه‌موو لایه‌كه‌وه له داڕشتنی پیلان و نه‌خشه‌ی دوژمنكارانه‌ی خۆیان دان به‌رامبه‌ر گه‌ل و خاكی كوردستان.
فه‌رمانده‌یی هێزه‌كانی حه‌فتای پێشمه‌رگه‌ی سه‌ر به یه‌كێتی نیشتمانی كوردستان ڕاگه‌یاندراوێكی له باره‌ی خۆپیشاندانه‌كان بڵاوكرده‌وه كه تیایدا هاتووه.. هه‌رێمی كوردستان به هه‌لومه‌رجێكی سه‌خت و مه‌ترسیداری پڕ له قه‌یرانی ئابووری و سیاسیدا تێپه‌ڕ ده‌بێت، ناحه‌زانی گه‌له‌كه‌شمان له هه‌موو لایه‌كه‌وه له داڕشتنی پیلان و نه‌خشه‌ی دوژمنكارانه‌ی خۆیاندان به‌رامبه‌ر گه‌ل و خاكی كوردستان، به‌داخه‌وه ئاشتیی كۆمه‌ڵایه‌تیی ناوخۆشمان خه‌ریكه به‌ره‌و لێكترازان ده‌چێت و چاره‌نووسی هه‌موومان به‌ره‌و داهاتوویه‌كی نادیار و ترسناك ده‌بات.
راگه‌یه‌ندراوه‌كانی هێزه‌كانی حه‌فتا ده‌شڵێ: هێزی پێشمه‌رگه‌ی كوردستان كه به ده‌ستهێنه‌ر و پارێزه‌ری ئه‌و ده‌ستكه‌وت و ئازادییه‌ی ئه‌مڕۆی كوردستانه كه به خوێنی شه‌هیدان و قوربانیدانی كۆمه‌ڵانی خه‌ڵكی كوردستان به‌رهه‌م هاتووه. له هه‌مان كاتدا پشتیوانی له هه‌موو داوا ڕه‌واكانی جه‌ماوه‌ری كوردستان ده‌كه‌ین له دابینكردنی مووچه و خزمه‌تگوزاریی شایسته بۆ هه‌موو شار و شارۆچكه و گونده‌كانی كوردستان.
فه‌رمانده‌یی هێزی حه‌فتا جه‌ختیشیكردۆته‌وه كه كه هه‌لومه‌رجی ئه‌مڕۆی كوردستان به‌رگه‌ی قه‌یرانی زیاتر ناگرێت ، له هه‌مانكاتیشدا پشتیوانی خۆی بۆ ده‌زگا ئه‌منی و هێزه‌كانی ناوخۆ بۆ به‌ره‌نگاربوونه‌وه‌ی هه‌موو كارێكی توندوتیژی و تێكدانی ئارامیی شاره‌كان دووپاتكردۆته‌وه .
کۆمێنت (0)
تا ئێستا هیچ کۆمێنتێک نەکراوە.