"یۆنامی" داوا لە خۆپیشاندەرانی ھەرێمی کوردستان دەکات خۆیان لە توندوتیژی بەدوور بگرن و داوای ھێورکردنەوەی رەوشەکەش دەکات.
نێردەی نەتەوە یەکگرتووەکان بۆ ھاوکاری عێراق "یۆنامی" راگەیەندراوێکی لەسەر خۆپیشاندەکانی ھەرێمی کوردستان بڵاوکردۆتەوە و نیگەرانی خۆیشی لە توندوتیژییەکان و ئەو زیانانە دەربڕیوە کە بەھۆی خۆپیشاندانەکانەوە روویانداوە.
"یۆنامی" ئاماژەشی کردووە بەوەی خۆپیشاندانی ئاشتییانە مافی دەستوری ھەموو گەلێکە و لێپرسراوانی ھەرێمی کوردستانیش بەرپرسیارێتی پاراستنی ھاووڵاتیان و خۆپیشاندەرانی لەسەرە.
ھەروەک داوایان لە ھێزە ئەمنییەکان و سەرجەم لایەنەکان کردووە پشوو درێژ بن و بە زۆرترین ئاستی وریای و ھۆشیارییەوە مامەڵە لەگەڵ رەوشەکە و خۆپیشاندەراندا بکەن."
یۆنامی جەختیشی کردەوە لەسەر گرنگی دوورکەوتنەوەی خۆپیشاندەران لەھەر کارێکی تێکدەر و توندوتیژی کە زیان بە مۆڵکی گشتی و تایبەت بگەیەنێت.
لەبەیاننامەکەدا ھەروەھا داوا لە لایەنە ئەمنییەکان کراوە کە کەمترین ھێز بەرامبەر خۆپیشاندەرەکان بەکاربھێنن و بەھەمان شێوە داوای لە خۆپیشاندەران کردووە بە ھێمنی و ئاشتی خۆپیشاندانەکانیان ئەنجام بدەن و" واز لە سوتاندان و خاپورکردنی بینا حکومی و حزبیەکان بھێنن".
کۆمێنت (0)
تا ئێستا هیچ کۆمێنتێک نەکراوە.