به‌ره‌به‌یانی ئه‌مرۆ به هۆی ئاگركه‌وتنه‌وه له كه‌مپێكی ئاواره‌كانی شنگال له زاخۆ زیاتر له 20 خێوه‌ت سووتان و زیانی ماددی لێكه‌وته‌وه.
دلێرئه‌حمه‌د، به‌رێوه‌به‌ری كه‌مپی بێرسیڤ یه‌ك له زاخۆ به ماڵپه‌ری ده‌زگای سه‌ته‌لایتی كوردستانی راگه‌یاند: كاتژمێر 7ی به‌ره‌به‌یانی ئه‌مرۆ به هۆی ئاگر كه‌وتنه‌وه له خێوه‌تی خێزانێكی ئاواره 20 خێوه‌تی چوارده‌وری گریان گرت و زه‌ره‌ری ماددی لێكه‌وته‌وه‌و خۆشبه‌ختانه زیانی گیانی نییه.
راشیگه‌یاند: تیمه‌كانی پۆلیسی ئاگركوژێنه‌وه ده‌ستبه‌جێ گه‌یشتنه كه‌مپه‌كه‌و كۆنترۆڵی ئاگره‌كه‌یان كرد، ئێستاش تیمه‌كانی شاره‌وانی زاخۆ و خزمه‌تگوزاری كه‌مپی به‌رسیڤ یه‌ك سه‌رقاڵی پاككردنه‌وه‌ی شوێنه سووتاوه‌كه‌ن و ئێمه‌ش وه‌ك ئیداره‌ی كه‌مپ به هاوكاری UN و ده‌زگا خێرخوازییه‌كانی تر خێمه‌و كه‌لو په‌لی ناو ماڵ و خوارده‌مه‌نیمان بۆ خێزانی خێمه سووتاوه‌كان ئاماده‌كردووه‌و دوای پاككردنه‌وه‌كه ده‌ست به دابه‌شكردنی خێمه و خزمه‌تگوزارییه‌كانی تر ده‌كرێت.
گوتیشی : لێكۆڵینه‌وه له هۆكاری ئاگر كه‌وتنه‌وه‌كه به‌رده‌وامه‌و به پێی زانیارییه سه‌ره‌تاییه‌كان به هۆی گڕگرتنی زۆپای غازه‌وه ئاگره‌كه كه‌وتووه‌ته‌وه.
کۆمێنت (0)
تا ئێستا هیچ کۆمێنتێک نەکراوە.