حكوومه‌تی عێراق بڕیاری راگرتنی گه‌شته نێوده‌وڵه‌تییه‌كانی بۆ فڕۆكه‌خانه‌كانی كوردستان درێژكرده‌وه و رایگه‌یاند، تا 28ی شوباتى 2018، هیچ گه‌شتێكی نێوده‌وڵه‌تی له فڕۆكه‌خانه‌كانی هه‌رێم ئه‌نجام نادرێت.
ته‌لار فایه‌ق، به‌ڕێوه‌به‌ری فڕۆكه‌خانه‌ی نێوده‌وڵه‌تی هه‌ولێر، رایگه‌یاند" راگرتنی گه‌شته نێوده‌وڵه‌تییه‌كانی فڕۆكه‌خانه‌كانی هه‌رێم له به‌رژه‌وه‌ندی به‌غدایه و ته‌نها هێلی ئاسمانی عێراق گه‌شتیاران ده‌گوازنه‌وه، بڕیاره‌كه‌ش له كاتێكدایه، كه هیوایه‌ك هه‌بوو بۆ دووباره كردنه‌وه‌ی فرۆكه‌خانه‌كانى هه‌رێم، به‌و پێیه‌ی قسه و باسی ده‌ستپێكردنی گفتوگۆ له نێوان هه‌ولێر و به‌غدا هه‌یه.
ئاشكراشی كرد، حه‌یده‌ر عه‌بادی، سه‌رۆك وه‌زیرانی عێراق، بڕیاره‌كه‌ی له ده‌ستی خۆیدا هێشتووه‌ته‌وه و ئه‌گه‌ر گوشاری كۆمه‌ڵگه‌ی نێوده‌وڵه‌تی نه‌بێت، ره‌نگه دۆخه‌كه به‌و شێوه‌یه به‌رده‌وام بێت.
له دوای ئه‌نجامدانی ریفراندۆمی سه‌ربه‌خۆیی هه‌رێمی كوردستان له 25ی ئه‌یلوولی رابردوو، حكوومه‌تی عێراق، كۆمه‌ڵه بڕیارى له دژی هه‌رێمی كوردستان ده‌ركرد، یه‌كێك له‌و بڕیارانه، راگرتنی گه‌شته نێوده‌وڵه‌تییه‌كانی فڕۆكه‌خانه‌كانی هه‌رێم بوو.
کۆمێنت (0)
تا ئێستا هیچ کۆمێنتێک نەکراوە.