مستەفا عەبدولڕەحمان سەرۆکى یەکێتى هاوردە و ناردنکارانى هەرێمى کوردستان رایگه‌یاند: جموجۆڵى بازرگانى نێوان تورکیا و هەرێمی كوردستان سستى تێ نەکەوتووە و بەراورد بە دوو ساڵى رابردوو رێژەى هاوردەکردن لە تورکیا سەدا (40) زیادی کردووە .
سەرۆکى یەکێتى هاوردە و ناردنکاران راشیگەیاند: حکوومەتى عێراق باجى زیاترى خستۆتەوە سەر هاوردە و هەناردەی نێوان هەولێر و بەغدا، ئەمەش بەربەستێکى گەورەى بۆ ئاڵوگۆڕى بازرگانى نێوان عێراق و هەرێمى کوردستان دروستکردووه.
مسته‌فا عه‌بدولڕحمان گوتیشی: رێژەى ئاڵوگۆڕ و هاوردە و هەناردەکردن لە نێوان تورکیا و هەرێمى کوردستان گەشەسەندن و بووژانەوەى زیاترى بەخۆوە بینیوە بەراورد بە دووساڵى رابردوو رێژەى هاوردەکردن لە نێوان تورکیا و هەرێمى کوردستان سەدا (40) زیادی کردووه.
ناوبراو ئاماژه‌ی به‌وه‌شدا كه ئێران بۆ ماوەى 10 رۆژ دەروازە سنوورییەکانى لەگەڵ هەرێمى کوردستان داخست، لەو ماوەیەدا هەموو بازرگانان و ئاڵوگۆڕە بازرگانییەکان ئاراستەیان بەرەو تورکیا گۆڕا.
ئێران دەروازەى سنوورى باشماخى کردۆتەوە و جموجۆڵە بارزگانییەکان لەگەڵ ئێرانیش دەستی پێکردەوە، بەو ئومێدەن دەروازە سنوورییەکانى دیکەشی لەگەڵ هەرێمی كوردستان بکاتەوە بۆ ئەوەى ئاڵوگۆڕە بارزگانییەکان ئاسایی بێتەوە.
سەرۆکى یەکێتى هاوردە و ناردنکارانى هەرێم دەڵێت: دواى ئەوەى ئێران سنوورى خۆی بەرووى هەرێم داخست ئێستا بازرگانانى هەرێمى کوردستان بۆ بازرگانیکردن زیاتر متمانەیان لەسەر تورکیایە، تورکیا بۆتە ئومێدێکى گەورەى بابەتە ئابوورى و بازرگانییەکان، کۆمەڵگەى سنووری نێودەوڵەتى ئیبراهیم خەلیل گرنگترین دەروازەى سنوورى بووە کە وەک جێگرەوەى هەموو دەروازەکان رێگر بوو لەوەى ئاڵوگۆڕى بازرگانى لە هەرێمى کوردستان پەکی بکەوێت.
کۆمێنت (0)
تا ئێستا هیچ کۆمێنتێک نەکراوە.