ڤلادیمێر پوتین، سه‌رۆكی رووسیا و ره‌جه‌ب ته‌یب ئه‌ردۆگان، سه‌رۆككۆماری توركیا، له‌سه‌ر به‌ستنی كۆنگره‌یه‌كی لوتكه‌ی نوێ له ئیستانبوڵ كه هاوشێوه‌ی كۆنگره‌ی سوچی بێت و سه‌رۆكی توركیا و رووسیا و ئیران كۆبكاته‌وه ریككه‌وتوون.
ئۆفیسی رۆژنامه‌وانی كرملین ئه‌مڕۆ پێنج شه‌ممه 8/2/2018 رایگه‌یاند: "سه‌رۆك كۆماری توركیا په‌یوه‌ندییه‌كی ته‌له‌فۆنی له‌گه‌ڵ ڤلادیمێر پوتین، سه‌رۆكی رووسیا ئه‌نجامداوه‌و دواین پێشڤه‌چوونه‌كانی ره‌وشی سووریا، له سه‌روویانه‌وه بارودۆخی عه‌فرین و ئیدلب و ره‌وشی مرۆیی له غوته‌ی رۆژهه‌ڵات باسكراوه.
به‌گوێره‌ی زانیارییه‌كانی ئۆفیسی رۆژنامه‌وانی كرملین، هه‌ر دوو سه‌رۆكه‌كه له‌سه‌ر به‌ستنی كۆنگره‌یه‌كی لوتكه له‌نێوان وڵاتانی ده‌سته‌به‌ری ئاشتی (رووسیا - ئێران -توركیا) له ئیستانبوڵ و درووستكردنی پێگه‌یه‌كی چاودیریی نوێی هاوبه‌ش له شاری ئیدلبی سووریا ریككه‌وتوون، باسی په‌یوه‌ندی نوێی ته‌له‌فۆنی دیكه‌شیان له‌نێوان هه‌ر سێ سه‌رۆكی رووسیا و ئێران و توركیا كردووه".
هه‌روه‌ها له‌سه‌ر ئاستێكی باڵای هه‌ماهه‌نگی له‌نێوان هێزه ئه‌منی و سه‌ربازییه‌كانی رووسیا و توركیا بۆ رووبه‌ڕووبوونه‌وه‌ی تیرۆر رێككه‌وتوون و ته‌ئكیدیان كردووه‌ته‌وه كه پابه‌ندبوون به رێككه‌وتنی ئه‌ستانا زۆر گرنگ و به بایه‌خه.
له لایه‌كى تره‌وه ره‌جه‌ب ته‌یب ئه‌ردۆگان سه‌رۆككۆماری توركیا رایگه‌یاند"باراك ئۆباما، سه‌رۆكی پێشووی ئه‌مریكا فێڵی له توركیا كردووه له‌باره‌ی هێزه كوردییه‌كان له شاری منبج، ئه‌مڕۆش دۆناڵد تره‌مپ له‌سه‌ر هه‌مان رێگای سه‌رۆكه‌كه‌ی پێش خۆی ده‌ڕوات و سه‌رله‌نوێ فێڵ له توركیا ده‌كات و به‌ڵێنی درۆ ده‌دات و ده‌ڵێت" ناكرێت هێزه كوردییه‌كان له شاری منبج بمیننه‌وه‌و له‌سه‌ریانه به‌ره‌و رۆژهه‌ڵاتی فورات بڕۆن".
هه‌روه‌ها گوتوویه‌تی: "تره‌مپ دانی به‌وه‌دا ناوه كه منبج شارێكه و خاوه‌نه‌كه‌ی عه‌ره‌به، به‌ڵام هه‌رچی له زاری تره‌مپ ده‌رده‌چێت جێبه‌جێ ناكرێت".
کۆمێنت (0)
تا ئێستا هیچ کۆمێنتێک نەکراوە.