سه‌رۆك كۆماری توركیا ڕه‌خنه له‌په‌رله‌مانی یه‌كێتی ئه‌وروپا ده‌گرێت به‌هۆی ئیدانه‌كردنی هێرشی سوپای وڵاته‌كه‌ی بۆ سه‌ر كانتۆنی عه‌فرینی رۆژئاوای كوردستان و رایده‌گه‌یه‌نێت كه “تا كاره‌كه‌مان كۆتایی نه‌یه‌ت، ئه‌وێ به‌جێناهێڵین.
هێرشه‌كانی سوپای توركیا بۆ سه‌ر كانتۆنی عه‌فرینی رۆژئاوای كوردستان به‌رده‌وامه‌و له‌تازه‌ترین لێدوانیدا ره‌جه‌ب ته‌یب ئه‌ردۆغان سه‌رۆك كۆماری توركیا رایگه‌یاند، له‌په‌رله‌مانی ئه‌وروپا له‌باره‌ی عه‌فرینه‌وه داوا له‌ئێمه كراوه ئۆپه‌راسیۆنه‌كه رابگرین. به‌یاننامه‌یه‌كیشیان بڵاوكردۆته‌وه ئه‌ویش هه‌ر ئه‌و ئاره‌زووه‌ی ده‌ربڕیوه. به‌بێ هۆ دڵتان خۆش مه‌كه‌ن، تا كاره‌كه‌مان كۆتایی نه‌یه‌ت، ئه‌وێ به‌جێناهێڵین.
ئه‌ردۆغان گوتیشی، په‌رله‌مانی ئه‌وروپا هیچ قسه‌یه‌كی نییه له‌باره‌ی توركیاوه بیكات، هه‌موو ئه‌و قسانه له‌گوێیه‌كمان دێته ژورەوەو له‌گوێیه‌كه‌ی دیكه‌مان دێته ده‌ره‌وه.
راشیگه‌یاندووه، “ئیدی هه‌مو شتێك وا ته‌واو ده‌بێت، ئه‌و پشتگیرییه‌ی بۆ قه‌ڵغانی فورات و لقی زه‌یتون نیشاندرا، نیشانه‌ی ئه‌وه‌یه كه ئه‌گه‌ر پێویست بكات، له‌به‌رامبه‌ر حه‌وت ده‌وڵه‌تدا ده‌وه‌ستێته‌وه.
له‌كۆبونه‌وه‌یه‌كی پێشتریدا په‌رله‌مانی یه‌كێتی ئه‌وروپا ئیدانه‌ی هێرشه‌كانی توركیای كرد بۆ سه‌ر عه‌فرین و داوای كۆتاییهاتنی كرد.
نزیكه‌ی دوو مانگه هێرشه‌كانی سوپای توركیاو میلیشیا هاوپه‌یمانه‌كانی بۆ سه‌ر كانتۆنی عه‌فرین به‌رده‌وامه‌و به‌و هۆیه‌وه ده‌یان هاووڵاتی مه‌ده‌نی شه‌هیدبوون و سه‌دانی دیكه بریندار بوون و ناوچه‌كه‌ش روبه‌ڕوی ره‌وشێكی ناسه‌قامگیر بۆته‌وه.
کۆمێنت (0)
تا ئێستا هیچ کۆمێنتێک نەکراوە.