له 120ه‌مین ساڵڕۆژی ڕۆژنامه‌گه‌ری كوردیدا سه‌ندیكای رۆژنامه‌نوسانی كوردستان ڕاگه‌یه‌نراوێك بڵاوده‌كاته‌وه و داوا ده‌كات ده‌زگاكانی رۆژنامه‌نووسی و میدیایی، به‌رژه‌وه‌ندی باڵای نیشتمانی كوردستان له‌به‌ر چاو بگرن.
ده‌قی ڕاگه‌یه‌نراوه‌كه‌ی سه‌ندیكای ڕۆژنامه‌نووسانی كوردستان:
له 120 هه‌مین ساڵیادی رۆژی رۆژنامه‌گه‌ری كوردستانی و 20 هه‌مین ساڵیادی دامه‌زراندنی سه‌ندیكای رۆژنامه‌نوسانی كوردستان
به‌ڕێزان رۆژنامه نووس و میدیاكارانی كوردستان
رۆژی 22 ی نیسان جه‌ژنی رۆژنامه‌گه‌ری كوردستانی‌و هه‌روه‌ها 20 هه‌مین ساڵیادی دامه‌زراندی سه‌ندیكای رۆژنامه‌نوسانی كوردستانه كه وه‌ك یه‌كه‌مین سه‌ندیكای داكۆكیكار له ماف و ئازادییه‌كانی كاری رۆژنامه‌نوسی له كوردستان كۆششی رێكخستن‌و په‌رپێدانی پیشه‌كه‌‌و هه‌وڵی دابینكردنی پێداویستیه‌كانی ده‌دات، به‌م بۆنه‌یه‌وه پیرۆزبایی گه‌رممتان لێ ده‌كه‌ین‌و ده‌ستی ماندونه‌بووتان ده‌گوشین، هیوادارین بواری ئازادی كاری رۆژنامه‌نووسی و پانتایی دیموكراسی رۆژ به‌رۆژ به‌رفره‌وانتر ببێت‌و پیشه‌ی رۆژنامه‌نووسیش پێداویستیه یاسایی‌و ماددی‌و دامه‌زراوه‌ییه‌كه‌ی ته‌واو ببێت.
له‌كوردستاندا وێرای كه‌م و كورڕی و گرفتی زۆر به‌لام تا راده‌یه‌كی باش ئازادی رۆژنامه‌وانی به یاساو به شێوه‌ی كرداریش فه‌راهه‌م كراوه ئه‌گه‌رچی هێشتا جێ ی ره‌زامه‌ندی ئێمه وه‌ك سه‌ندیكا و رۆژنامه‌نوس و میدیاكارانیش نییه به‌ڵام هه‌نگاوی باش نراوه‌و هه‌نگاوه‌كانیش به‌رده‌وامن تاوه‌كو به‌ره‌و باشتر ببرێت، له‌م چوارچێوه‌یه‌دا، ئه‌نجوومه‌نی سه‌ندیكا كار له‌گه‌ڵ لیژنه په‌یوه‌ندیداره‌كانی په‌رله‌مان ده‌كات بۆئه‌وه‌ی بنه‌مای جێبه‌جێكردنی یاساكان باشتر بكرێت‌و هه‌موواری گونجاو بۆ قۆناغی داهاتوو كه خزمه‌تی گشتی كار‌و پیشه‌ی رۆژنامه‌نووسی‌و ئازادی میدیا بكات‌و سندوقی خانه‌نشینی رۆژنامه‌نووسانیش كارا بكرێت‌و زه‌مانه‌تی ئاینده‌ی رۆژنامه‌نووسان بكات.
رۆژنامه‌نوسان و میدیاكارانی خۆشه‌ویست
كاریگه‌ری رۆڵی رۆژنامه‌‌و ته‌له‌ڤزیۆن‌و رادیۆ‌و میدیای ئه‌لیكترۆنی به‌گشتی‌و پیشه‌ی رۆژنامه‌نوسی به‌تایبه‌تی، رۆڵێكی كارای گرنگی هه‌یه، له‌م روانگه‌یه‌یه‌وه، ئه‌نجوومه‌نی سه‌ندیكا ده‌خوازێت ، سه‌رجه‌م بواره‌كان له‌سه‌ر بنه‌مای دامه‌زراوه‌یی بونیاد بنرێت‌و گرێبه‌ستی به‌تاك‌و باش‌و شه‌فاف له‌نێوان ده‌زگای میدیایی‌و رۆژنامه‌نووسان به‌لایه‌ك‌و گرێبه‌ستی به‌كۆمه‌ڵیش، بواری پیشه‌كه رێك بخات.
رۆژنامه‌نوسان و میدیاكارانی خۆشه‌ویست
بۆ ئێستای كوردستان، هاوكاتی ئه‌م بۆنه‌یه، پرۆسه‌ی هه‌ڵبژاردنی ئه‌نجومه‌نی نوێنه‌رانی عێراق‌و به‌تایبه‌تیش پرۆسه‌ی هه‌ڵمه‌ت‌و بانگێشه‌ی راگه‌یاندنی لیست‌و قه‌واره‌و كاندیده‌كان به‌ڕێوه ده‌چێت، كه‌هه‌مووشی له‌باوه‌شی هۆكاره‌كانی راگه‌یاندن‌و ده‌زگاكانی میدیا جێگا ده‌گرێت، به‌مه‌ش كه‌شێكی گه‌رمی ململانێی له‌گوتاری نێو راگه‌یاندنه‌كان دروست ده‌بێت، بۆئه‌وه سه‌ندیكای رۆژنامه‌نووسان داوا له‌هه‌موو لایه‌ك ده‌كات:
- ده‌زگاكانی میدیا به‌گشتی ده‌ست به‌پره‌نسیپی پیشه‌كه‌‌و میساقی شه‌ره‌فی رۆژنامه‌نووسییه‌وه بگرن و مافی خۆیان به‌دوور له‌تانه‌و ناوزڕاندن‌و ده‌رچوون له‌یاسا به‌ركاره‌كان، پیاده بكه‌ن.
- كاری رۆژنامه‌نووس و ده‌زگای میدیایی نییه ببێته گوتاربێژی راسته‌وخۆی هه‌ڵمه‌تی هه‌ڵبژادرن‌و ململانێ سیاسیه‌كان به‌قه‌ده‌ر ئه‌وه‌ی ده‌توانێت وه‌كو ئامرازێكی راگه‌یاندن پانتایی بۆ بانگێشه‌ی هه‌ڵبژاردن بڕه‌خسێنێت.
- پێویسته ده‌زگاكانی رۆژنامه‌نووسی‌و میدیایی، به‌رژه‌وه‌ندی باڵای نیشتمانی كوردستان له‌به‌ر چاو بگرن‌و نه‌بنه هۆكاری تێكدانی ئاشته‌وایی كۆمه‌ڵایه‌تی‌و سنوری ئاساییشی نیشتمانی نه‌به‌زێنن‌و ده‌ستككه‌وته‌كانی گه‌لی كوردستان به‌رز رابگرن.
- نابێت به‌هیچ شێوه‌یه‌ك ده‌زگای میدیایی له‌كار بخرێت مه‌گه‌ر به‌بڕیاری دادگا و نابێت كاری رۆژنامه‌نووسی په‌ك بخرێت، هه‌ر داواكارییه‌كی یاساییش هه‌بێت ، پێویسته په‌نا ببرێته به‌ر دادگاكانی هه‌رێمی كوردستان‌و رێوشوێنی یاسایی بگیرێته به‌ر به‌پێی یاسای رۆژنامه‌گه‌ری ژماره 35ی ساڵی 2007.
ئه‌نجومه‌نی سه‌ندیكای رۆژنامه‌نووسانی كوردستان
22ی نیسانی 2018
كوردستان تیڤی/ كامه‌ران حاجی
کۆمێنت (0)
تا ئێستا هیچ کۆمێنتێک نەکراوە.