یۆرۆپۆل پۆلیسی یه‌كێتیی ئه‌وڕوپا رۆژی رابردوو رایگه‌یاند كه هێرشێكی سایبه‌ریی به‌هێزی كردووه‌ته سه‌ر بنكه هه‌واڵییه‌كانی داعش له‌سه‌ر تۆڕی ئینته‌رنێت و به‌م هۆیه‌وه توانای ئۆرگاكانه‌كانی راگه‌یاندنی داعشی به رێژه‌یه‌كی زۆر كه‌مكردووه‌ته‌وه.
رۆب ڤینرایت سه‌رۆكی یۆرۆپۆل كه شاره‌زای به‌ره‌نگاربوونه‌وه‌ی تاوانكارییه له به‌یاننامه‌یه‌كدا رایگه‌یاند: ئێمه گورزێكی به‌هێزی سایبه‌ریمان له‌و بنكه ئینته‌رنێتییانه‌ی داعش وه‌شاند كه بانگه‌شه‌یان بۆ ئه‌م گروپه ده‌كرد و گه‌نجانی ئێمه‌یان بۆلای خۆیان راده‌كێشا.
رێبه‌رایه‌تیی ئه‌م ئۆپه‌راسیۆنه له ئه‌ستۆی داواكاری گشتیی به‌لژیكا بوو، كه تیایدا پۆلیسی ئه‌وڕوپا چه‌ندین سێرڤه‌ری ئه‌م گروپه تیرۆریستییه‌ی له وڵاتانی هۆڵه‌ندا و كه‌نه‌دا و ئه‌مریكا خسته ژێر كۆنتڕۆڵی خۆی، ئه‌مه وێڕای ئه‌و كه‌ره‌سته ئه‌لیكترۆنییانه‌ی كه له وڵاتانی به‌لژیكا و فه‌ڕه‌نسا و رۆمانیا جێگیر كرابوون، كه ده‌ستی به‌سه‌ر ئه‌وانیشدا گرت.
له‌م هێرشه سایبه‌رییه‌دا ماڵپه‌ڕی " ئه‌عماق " و رادیۆی ئینته‌رنێتیی " ئه‌لبه‌یان " و هه‌روه‌ها ماڵپه‌ڕی " نه‌شیر " كرانه ئامانج.
سه‌رچاوه / رادیۆ فه‌ڕه‌نسا
مه‌سعود / كوردستان تیڤی
کۆمێنت (0)
تا ئێستا هیچ کۆمێنتێک نەکراوە.