سەرۆکی لیژنەی ئاسایش و بەرگری لە ئەنجومەنی نوێنەران رایگه‌یاند: بۆ ئەنجامدانی ساختەکاری دەیانەوێت پێش رۆژی هەڵبژاردن ئامێری دەنگدانی ئەلیکترۆنی پەکبخەن.
ئەمڕۆ 5ی ئایاری 2018 سەرۆکی لیژنەی ئاسایش و بەرگری لە ئەنجومەنی نوێنەرانی عێراق رایگەیاند "هەندێک لایەنی باڵادەست بۆ ئەنجامدانی ساختەکاری دەیانەوێت پێش رۆژی هەڵبژاردن ئامێری دەنگدانی ئەلیکترۆنی پەکبخەن.
حاکم الزاملی، سەرۆکی لیژنەی ئاسایش و بەرگری لە ئەنجومەنی نوێنەرانی عێراق بە کەناڵی سومەریەی راگەیاندوە زانیاری هەواڵگریمان بەدەستگەیشتووە کە هەندێک لایەنی دەستڕۆیشتوو دەیانەوێت لە پێش رۆژی هەڵبژاردن ئامێری ئەلیکترۆنی دەنگدان و جیاکردنەوەی دەنگەکان تێکبدەن بۆ ئەوەی بە شێوەکەی جاران و لەڕێگەی دەستەوە دەنگەکان جیابکرێنەوە و لەو رێگەیەشەوە ساختەکاری بکەن.
گوتیشی: ئەو لایەنانە لە هەڵبژاردنەکانی پێشوودا چەندین شێوەی ساختەکاری هاوشێوەیان کردووە و لەو رێگەیەشەوە کەسانی گەندەڵیان گەیاندوەتە ناوەندەکانی بڕیار لە وڵاتدا، بۆیە ئەمجارەش دەیانەوێت بە چەند کاتژمێرێک پێش دەستپێکردنی هەڵبژاردنەکە ئامێرەکان تێکبدەن.
گوتیشی: پێویستە کۆمسیۆنی باڵای سەربەخۆی هەڵبژاردنەکان بەرپرسیارێتی تەواوی پاراستنی ئەو ئامێرانە بگرێتە ئەستۆ و سەرجەم رێوشوێنەکان توندتر بکات بۆ پاراستنی ئامێرەکان.
بڕیارە رۆژی 12/5/2018 هەڵبژاردنی پەرلەمانی عێراق لە سەرجەم شارەکانی عێراق و هەرێمی کوردستان ئەنجام بدرێت، کە تێیدا نزیکەی حەوت هەزار کەس رکابەریی لەسەر 328 کورسیی پەرلەمانی عێراق دەکەن.
کۆمێنت (0)
تا ئێستا هیچ کۆمێنتێک نەکراوە.