بۆریس جۆنسن وەزیری دەرەوەی بەریتانیا داوای لە سەرۆکی ئەمەریکا دۆناڵد تره‌مپ کرد بڕیار لەسەر کۆتایی هێنان بە ڕێکەوتنە ناوەکییەی ئێران نەدات و وتی ڕێکەوتنەکە خاڵی لاوازی تێدایە بەڵام دەکرێت بە تێپەڕبوونی کات چارەسەر بکرێت.
وتیشی لەم کاتەدا بەڕیتانیا لەگەڵ بەڕێوبەرایەتییەکەی سەرۆک ترامپ و فەڕەنسا و ئەڵمانیای هاوپەیمان کاردەکات بۆ گرەنتی ئەوەی چارەسەری ئەو خاڵە لاوازانە بكه‌ین.
جۆنسن ئاماژه‌ی به‌وه‌شكرد هێشتا بەڕیتانیا و فەڕەنسا و ئەڵمانیا بە ڕێکەوتنە ناوەکیەکەوە پابەندن بەڵام دەیانەوێت دوای کۆتایی هاتنی وادەی ڕێکەوتنەکە جارێکی دیکە دەست بکەنەوە بە دانوستاندن سەبارەت بە بەرنامە موشەکییە باڵیستیکییەکەی ئێران و چالاکیە ناوەکییەکانی و هەروەها ڕۆڵی ئێرانیش لە ململانێکانی ڕۆژهەڵاتی ناوەڕاستدا وەکو سوریا و یەمەن.
هه‌ر سه‌باره‌ت به كشانه‌وه له ڕێكه‌وتنه‌كه وه‌زیری ده‌ره‌وه‌ی به‌ریتانیا وتی هیچ سوودێک نابینێت لە لەدەستدانی ئەو کۆت و زنجیرانەی کە ڕێکەوتنەکە هەیەتی لەسەر بەرنامە ناوەکییەکەی ئێران و ڕوونیشی کردەوە تاران یەکەمین لایەن دەبێت کە سوود لە کشانەوەی ئەمەریکا دەبینێت لە ڕێکەوتنەکەدا.
جێی ئاماژەیە سەرۆکی فەڕەنسا ئیمانوێل ماکرۆن و ڕاوێژکاری ئەڵمانیا ئانگێلا مێرکڵ بە هەمان شێوە هەوڵیاندا سەرۆک ترامپ ڕازی بکەن لەسەر ڕێکەوتنەکە بمێنێتەوە و ماکرۆنیش هۆشیاریدا لەوەی کە ئەگەر ئەمەریکا بکشێتەوە ئەوا لەوانەیە جەنگ ڕووبدات.
کۆمێنت (0)
تا ئێستا هیچ کۆمێنتێک نەکراوە.