باڵه‌خانه‌ی قایمقامیه‌ت و ماڵی قایمقام له‌ میسان سوتێنرا

به‌رپرسێكی پارێزگای میسان رایگه‌یاند كه‌ خۆپیشانده‌رانی ناڕازی بینای قایمقامیه‌ت و ماڵی قایمقامیان سوتاندوه‌ و 23 كه‌سیش برینداربوون.

عه‌لی عه‌لاق، به‌ڕێوه‌به‌ری گشتیی ته‌ندروستی پارێزگای میسان به‌ سۆمه‌ریه‌ نیوزی راگه‌یاند: خۆپیشانده‌رانی توڕه‌ ئه‌مڕۆ یه‌كشه‌ممه‌ 15ی ته‌مموزی 2018، بینای قایمقامیه‌ت و ماڵی قایمقامیان سوتاندووه‌.

ئاشكراشیكرد كه‌ 23 بریندار گه‌یه‌ندراونه‌ته‌ نه‌خۆشخانه‌ی میسان و 6 له‌برینداره‌كان گولـله‌یان به‌ركه‌وتووه‌.

ماوەی چەند رۆژێکە بەهۆی بێکاریی و نەبوونی خزمەتگوزارییەکانی کارەبا و ئاو خۆپیشاندان لە ناوچەکانی ناوەڕاست و باشوری عێراق دەستیپێکردووە و لەهەندێک شوێن توندوتیژی دروستبووە کە بەهۆیەوە 3 هاووڵاتی کوژراون و چەندین کەسی دیکە برینداربوون، دەسەڵاتدارانی عێراقیش بۆ کپکردنەوەی خۆپیشاندانەکان تۆڕە کۆمەڵایەتییەکانیان قەدەغەکردووە.