به شێوه‌یه‌كی گشتی به‌كارهێنانی جگه‌ره بۆ ته‌ندروستی مرۆڤ زیانێكی زۆری هه‌یه ، به تایبه‌ت به‌كارهێنانی جگه‌ره‌ی ئه‌لیكترۆنی مه‌ترسی زۆری بۆ ده‌ماری خوێن و دڵ هه‌یه .
زانایانی ئه‌مریكی توێژینه‌وه‌یه‌كیان له به‌شی پزیشكی زانكۆی بۆستن ئه‌نجامداوه و ده‌ركه‌وتووه به هۆی بوونی ئه‌و تام چێژه‌ی كه ده‌كرێته جگه‌ره‌ی ئه‌لیكترۆنییه‌وه ، زیان به‌ر ده‌ماره‌خانه‌كانی خوێن و دڵ ده‌كه‌وێت .
زانا ئه‌مریكییه‌كان ئه‌م تاقیكردنه‌وه‌یان له سه‌ر 9 جۆری تامی جگه‌ره ئه‌لیكترۆنییه‌كان ئه‌نجامداوه كه بریتیبون له " مۆز ، كه‌رێ ، دارچین ، گوڵی كۆڤ ، گولی ئیوكالیپته‌س ، نه‌عنا ، شیلك ، ڤانیلا و گه‌نمه شامی " ئه‌مانه له‌سه‌ر خانه‌كانی ده‌مار و دڵ تاقیكراونه‌ته‌وه و له ئه‌نجامدا ده‌ركه‌وتوو كه زیانێكی زۆر به‌م خانانه ده‌گه‌یه‌نن .
یه‌كێك له توێژه‌ره‌كانی به‌شدار بوو له‌م توێژینه‌وه‌یه به ناوی " جێسیكا فیته‌رمان " ئاشكرایده‌كات كه ئه‌و تامه‌ی له ده‌خرێته جگه‌ره‌ی ئه‌لیكترۆنییه‌وه به ته‌نیا و بێ بوونی ئه‌و پێكهاتانه‌ی دیكه كه له جگه‌ره‌ی ئه‌لیكترۆنیدا هه‌ن ، مه‌ترسی تووشبوون به نه‌خۆشییه‌كانی دڵ زیاد ده‌كات .
جێی ئاماژه‌یه ، جگه‌ره‌ی ئه‌لیكترۆنی به شێوه‌یه‌كی به‌ربڵاو به‌كارده‌هێنرێت و به‌كارهێنه‌ران وه‌ك جێگره‌وه‌یه‌ك بۆ جگه‌ره به‌كاریده‌هێنن .
کۆمێنت (0)
تا ئێستا هیچ کۆمێنتێک نەکراوە.