رێكخراوێكی سه‌ر به نه‌ته‌وه‌یه‌كگرتووه‌كان ئاشكرای ده‌كات له ماوه‌ی شه‌ڕی نێوخۆی سووریا كه حه‌وت ساڵه به‌رده‌وامه ئه‌و وڵاته نزیكه‌ی 388 ملیارد دۆلار زیانی به‌ركه‌وتووه.
ئاژانسی ئاسۆشیتد پرێس به پشت به‌ستن به ئاماره‌كانی كۆمسیۆنی ئابووری و كۆمه‌ڵایه‌تی رێكخراوی نه‌ته‌وه یه‌كگرتووه‌كان بۆ رۆژئاوای ئاسیا زیانه ماددیه‌كانی جه‌نگی له‌وانه‌ش، وێرانبوونی خانوو و باڵاخانه‌كان و جاده‌وبان و پڕۆژه‌كانی گه‌وره‌ی وه‌ك ژێرخانی ئابووری، به نزیكه‌ی 320 ملیار دۆلار خه‌مڵاندووه.
به پێی ئه‌و دامه‌زراوه نێوده‌وڵه‌تیانه، ئه‌و تێچوویانه‌ی كه به‌هۆی جه‌نگ به كه‌رتی به‌رهه‌مهێنان كه‌وتووه یاخود به‌ر به‌رهه‌مهێنانی گشتی ئه‌و وڵاته كه‌وتووه به 268 ملیار دۆلار ده‌خه‌مڵێندرێت.
كۆمسیۆنی ئابووری و كۆمه‌ڵایه‌تی رێكخراوی نه‌ته‌وه یه‌كگرتووه‌كان بۆ رۆژئاوای ئاسیا ئه‌م بابه‌ته‌ی له كۆنفرانسی تایبه‌ت به پرسی ئاوه‌دانكردنه‌وه‌ی سووریا خسته‌ڕوو كه له به‌یروتی پایته‌ختی لوبنان و بۆ ماوه‌ی دوورۆژ به‌ڕێوه‌ده‌چێت و تێدا ژماره‌یه‌كی به‌رچاو له شاره‌زایانی نێوده‌وڵه‌تی به‌شدارن.
چاودێرانی ره‌وشی سووریا رایده‌گه‌ینن كه له میانی جه‌نگی نێوخۆی سووریا كه حه‌وت ساڵه به‌رده‌وامه لانیكه‌م 400 هه‌زار كه‌س كوژران و زیاتر له 11 ملیۆن كه‌سی دیكه‌ش ئاواره و كۆچبه‌ر بوون كه ئه‌مه‌ش نزیكه له نیوه‌ی ژماره‌ی دانیشتوانی سووریا.
کۆمێنت (0)
تا ئێستا هیچ کۆمێنتێک نەکراوە.