وه‌زیری نوێی ئاسایشی سایبه‌ریی ژاپۆن له لێدوانێكی جه‌نجاڵیدا رایگه‌یاند: هیچكات له ژیانیدا كۆمپیۆته‌ری به‌كارنه‌هێناوه و ته‌نانه‌ت هیچكات به كیبۆردیش كرداری تایپی ئه‌نجام نه‌داوه.
یوشیتیكا ساكورادا كه وه‌زیری نوێی ئاسایشی سایبه‌ریی ژاپۆنه و ته‌مه‌نی 68 ساڵه له كۆبوونه‌وه‌یه‌كی په‌رله‌مان و له وه‌ڵامی پرسیاری په‌ڕله‌مانتارانی وڵاته‌كه‌ی راگه‌یاند: له ته‌مه‌نی 25 ساڵی و له‌وكاته‌وه‌ی پله و پایه‌م به‌ده‌ستهێناوه، بۆ راییكردنی كاره‌كانم فه‌رمانم به كارمه‌ند و سكرتیره‌كانم كردووه و هه‌رگیز كۆمپیوته‌رم به‌كارنه‌هێناوه.
شڵه‌ژانی ئه‌م وه‌زیره سه‌باره‌ت به زانیاریی له‌سه‌ر كۆمپیوته‌ر كاتێك ده‌ركه‌وت كه ناوبراو هه‌وڵیده‌دا وه‌ڵامی پرسیاری ئه‌ندامانی په‌رله‌مان بداته‌وه سه‌باره‌ت به به‌كارهێنانی ئامێری USB له بنكه ئه‌تۆمییه‌كاندا، كه له وه‌ڵامه‌كانیدا به‌هۆی بێئاگایی له چۆنییه‌تی به‌كارهێنانی ئامێره‌كه، زانیاریی هه‌ڵه‌ی خسته‌ڕوو.
ماساتۆ ئیمێ نوێنه‌ری به‌ره‌ی ئۆپۆزیسیۆنی په‌رله‌مانی ژاپۆن سه‌باره‌ت به‌م رووداوه وتی: جێگه‌ی باوه‌ڕ نییه كه‌سێك بووه‌ته وه‌زیری ئاسایشی سایبه‌ریی كه تا ئێستا كۆمپیوته‌ری به‌كارنه‌هێناوه.
ئه‌م رووداوه له تۆڕه كۆمه‌ڵایه‌تییه‌كاندا ده‌نگیداوه‌ته‌وه و بووه‌ته مایه‌ی ره‌خنه و گاڵته‌جاڕیی.
سه‌رچاوه / یۆرۆ نیوز
مه‌سعود / كوردستان تیڤی
کۆمێنت (0)
تا ئێستا هیچ کۆمێنتێک نەکراوە.