كۆنگره‌یه‌كی زانستی بۆ لێكدانه‌وه‌ی كه‌سایه‌تی، ئاسه‌واره‌كان و كاریگه‌ریی ڕه‌وتی عیرفانی مه‌ولانا خالید شاره‌زووری له شاری سنه‌ی ناوه‌ندی پارێزگای كوردستان به‌ڕێوه‌چوو.
به ئاماده‌بوونی مامۆستایان و زانایانی ئایینی له وڵاتانی عێراق، توركیا و سووریا، كۆنگره‌ی یادی مه‌ولانا خالید شاره‌زووری له زانكۆ كوردستان له شاری سنه به‌ڕێوه‌چوو.
له‌م كۆنگره‌یه‌دا كه چوارشه‌ممه‌ی ڕابردوو به‌ڕێوه‌چوو، مامۆستایانی ناسراوه‌ی سوننه و زانایانی حوجره‌كانی ناوچه كوردنشینه‌كانی ئێران و ژماره‌یه‌كی زۆری مامۆستا و لێكۆڵه‌ر له عێراق، توركیا و سووریا به‌شداربوون.
له كۆنگره‌كه‌دا شه‌ش وتار خوێندرانه‌وه و چه‌ند مامۆستایه‌ش قسه‌یان كرد.
دكتۆر ئه‌خلاقیان، سه‌رۆكی زانستگای كوردستان به ئاماژه به پێویستیی به‌ڕێوه‌چوونی كۆنگره زانستییه‌كان له زانكۆكان، وتی: زانستگای كوردستان ئاماده‌یی ته‌واوی هه‌یه به هاوكاری حوجره‌كان یادی كه‌سایه‌تییه گه‌وره‌كانی كورد بكاته‌وه.
له‌م كۆنگره‌یه‌دا 51 وتاری زانستی له شاره كوردنشینه‌كانی ئێران و له وڵاتانی عێراق و توركیا بۆ نووسینگه‌ی كۆنگره نێردرابوو كه ته‌نیا مۆڵه‌تی خوێندنی شه‌ش وتار درا و دیكه‌ی وتاره‌كان چاپ ده‌كرێن.
مه‌لا شێخ خالیدی شاره‌زووری ناسراو به «مه‌ولانا خالید» كه نازناوی «چیا‌والدّین» و «ژی الجناحین» یش هه‌بووه، یه‌كێكه له كه‌ڵه پیاوانی كوردستان له گۆڕه‌پانی خوداناسی و زانیاری‌دا؛ خوداناسێكی گه‌وره‌ی وا كه له گه‌ڵ ئه‌و ته‌مه‌نه كورته‌یدا گه‌یشته به‌رزترین پله‌ی ناوداری و خۆشه‌ویستی، به جۆرێك كه كاتێ له هیندستان له خزمه‌تی «شا عبدالله دهلوی» گه‌ڕایه‌وه، هه‌زاران كه‌س له زانایانی ئایینی و گه‌وره پیاوان و خه‌ڵكی‌تر به‌ره‌و پیری ڕۆیشتن و بوون به موریدی و له سه‌رده‌می ژیانی‌دا، ناوبانگی زانایی و خواناسیی ئه‌و، بێجگه له كوردستان، له وڵاتانی ئێراق، ئێران، توركیا، سووریا، میسر، عه‌ره‌بستان و ئه‌فغانستان و... ده‌نگی دایه‌وه و به هه‌زاران هه‌زار مورید و په‌یڕه‌وی بوو و هه‌ر له ژیانی خۆیدا، هه‌ندێك له زانایانی ئایینی و گه‌وره مامۆستایانی ئه‌و سه‌رده‌مه له عه‌رب و تورك و كورد كتێبیان سه‌باره‌ت به‌و نووسی (ژماره‌ی ئه‌م كتێبانه ده‌گات به نزیكه‌ی 20 كتێب) و له كۆچی دوایی‌یشیدا، به شیعر و نووسراوه‌ی به‌رز لاواندیانه‌وه.
مه‌ولانا، كتێبی زۆری نووسیون و هه‌روه‌ها به كوردی و فارسی و عه‌ره‌بی شیعری نووسیوه كه زۆربه‌ی شیعره‌كانی پاڕانه‌وه له خوا و پێغه‌مبه‌ر(د.خ) و مه‌دحی پیاوچاكانن.
سه‌رچاوه/ جام كوردی
كوردستان تیڤی/ كامران
کۆمێنت (0)
تا ئێستا هیچ کۆمێنتێک نەکراوە.