ئەمرۆ لوتکەی جی 20 لە ئەرجەنتین دەست بەکارەکانی دەکات و بەماوەیەکی کەم پێش دەست پێکردنی لوتکەکەش سەرۆکی ئەمریکاش دیدارەکەی لەگەڵ سەرۆکی روسیا ھەڵوەشاندەوە.
ئەمڕۆ ھەینی 30ی تشرینی دووەمی 2018، لە بۆینس ئایرێسی پایتەختی ئەرجەنتین لوتکەی جی 20 بەڕێوەدەچێت و بڕیارە چەند دۆسێییەک گفتوگۆ بکات، کە دیارترینیان شەڕی بازرگانی و گۆڕانی کەشوھەواو ئەو گرژییە نوێیەیە لە ئۆکرانیا سەریھەڵداوە.
پێش کۆبوونەوەکانیش دۆناڵد ترەمپی سەرۆکی ئەمریکا رایگەیاند، بەھۆی دەستبەسەرکردنی گروپێکی دەریاوانی ئۆکرانیا لە لایەن روسیاوە، دیدارەکەی لەگەڵ ڤلادیمێر پۆتنی سەرۆکی روسیا ھەڵوەشاندوەتەوە.
ھەڵوەشاندنەوەی دیدارەکەی لەگەڵ ڤلادیمێر پۆتن لە لایەن دۆناڵد ترەمپەوە بە چاوەڕوان نەکراو دادەنرێت بە تایبەت لە کاتێکدا چەند کاتژمێرێک پێش لە ھەڵوەشاندنەوەی، دۆناڵد ترەمپ جەختی لە ئەنجامدانی دیدارەکەی لەگەڵ سەرۆکی روسیا کردبوەوە.
پێشبینی دەکرێت، ھەریەک لە ئەمریکا و کەنەدا و مەکسیک لە لوتکەکەدا واژۆی کۆپییەکی چاککراوی رێکەوتنی بارزگانی ئازاد بکەن لە ئەمریکای باکور"نافتا".
سەرۆکی سندوقی نێودەوڵەتی دراویش رایگەیاند، ھەڕەشەکانی دۆناڵد ترەمپ بە سەپاندنی گومرگ بەسەر ئۆتۆمبێلی ئەوروپا و یاباندا زیان بە ئابوری جیھان دەگەیەنێت.
کریستین لاگاردی سەرۆکی سندوقەکە ئەوەشی وت، دەرچوونی بەریتانیاش لە یەکێتی ئەوروپا بە ھەڕەشەیەکی تر دادەنرێت بۆ سەرگەشەکردنی ئابوری جیھان.
کۆمێنت (0)
تا ئێستا هیچ کۆمێنتێک نەکراوە.