د. ڤالا فەرید، سەرۆکی پەرلەمانی کوردستان، بە ئامادەبوونی مونا نەبی قەھوەچی، سکرتێری پەرلەمانی کوردستان، لە نووسینگەی خۆی لە تەلاری پەرلەمان پێشوازیی لە جولیس تۆریس، باڵیۆزی فلیپین لە عێراق و شاندی یاوەری کرد.
لە دیدارێکدا جولیس تۆریس، باڵیۆزی فلیپین لە عێراق، پیرۆزبایی لە سەرۆک و سکرتێری پەرلەمان کرد بەبۆنەی دەستبەکاربوونیان لە دەستەی سەرۆکایەتیی پەرلەمان و خۆشحاڵیی خۆی بەبوونی ئافرەت لەو پۆستە سیادییانە لە ھەرێمی کوردستان دەربڕی و رایگەیاند كه بە خۆشحاڵییەوە یەکەم جارە سەردانی پەرلەمانی کوردستان دەکەم و دەمانەوێت پەیوەندییەکی بەھێز درووست بکەین لە نێوان ھەرێمی کوردستان و وڵاتی فلیپین لە رووی بازرگانی و وەبەرھێنان و دیپلۆماسییەوە.
ھەروەھا بەھۆی ئابووریی ھەرێمی کوردستانەوە خەڵکێکی زۆری فلیپین لە ھەرێمی کوردستان کاردەکەن و ھەرێمی کوردستان بەرەو بووژانەوەی زیاتر ھەنگاو دەنێت و بۆ ئەم مەبەستە لە داھاتوویەکی نزیکدا کونسوڵخانەی فلیپین لە ھەرێمی کوردستان دەکەینەوە.
ھەر لەدیدارەکەدا باڵیۆزی فلیپین لە عێراق، رۆلی ھەرێمی کوردستان و پێشمەرگەی کوردستانی لە رووبەڕووبوونەوەی تیرۆریستانی داعش بەرزنرخاند.
لای خۆشییەوە د.ڤاڵا فەرید، سەرۆکی پەرلەمانی کوردستان، رایگەیاند كه خوازیاری دروستبوونی پەیوەندییەکی بەھێزین لە نێوان پەرلەمانی کوردستان و پەرلەمانی فلیپین لەچوارچێوەی یاسا بەرکارەکانی ھەرێمی کوردستان و ھەروەھا بۆ لیژنەکانی پەرلەمانیش پێویستمان بەئاشنابوونی زیاترە لە ھەموو رووییەکەوە لەچوارچێوەی کاری پەرلەمانیدا"، ھیواشی خوست کە بەزوویی کونسوڵخانەی فلیپین لە ھەرێمی کوردستان بکرێتەوە بۆ بەھێزبوونی پەیوەندیی نێوان ھەردوولا و پێویستیی کونسوڵخانەکەش بۆ بوونی ئەم ژمارە خەڵکەی ڤلیپین کە لەھەرێمی کوردستان کاردەکەن بە گرنگ زانی.
کۆمێنت (0)
تا ئێستا هیچ کۆمێنتێک نەکراوە.