نوێنەرایەتیی حكوومەتی هەرێمی كوردستان لە واشنتونی پایتەختی ئەمەریكا، یادی 31 ساڵەی كیمیابارانی هەڵەبجە دەكاتەوە و نوێنەرانی هەڵەبجەش بەشداری دەكەن.
لوقمان عەبدولقادر، سەرۆكی كۆمەڵەی قوربانیانی كیمیابارانی هەڵەبجە، بە ماڵپەڕی فەرمیی پارتی دیموكراتی كوردستانی ڕاگەیاند: "ساڵانە نوێنەرایەتیی حكوومەتی هەرێمی كوردستان لە وڵاتی ئەمەریكا یادی كیمیابارانی هەڵەبجە دەكاتەوە، ئێمەش داوامان كردبوو كە لەمساڵدا نوێنەری هەڵەبجە بەشداری لە یادەكەدا بكات".
عەبدولقادر گوتیشی: "لەسەر داواكەی ئێمە، ئەمساڵ نوێنەرایەتیی حكوومەتی هەرێم لە ئەمەریكا پارێزگاری هەڵەبجەیان ئاگادار كردووەتەوە، كە پێنج كەس وەك نوێنەری هەڵەبجە بڕۆن بۆ ئەمەریكا و بەشداریی یادی كیمیاباران بكەن لەو وڵاتەدا، كە دوو كەس لە بەركەوتووانی چەكی كیمیایی و دوو كەس لە بەڕێوەبەرایەتیی شەهیدان، بە سەرپەرشتی قایمقامی هەڵەبجە دەڕۆنە ئەمەریكا".
سەرۆكی كۆمەڵەی قوربانیان روونیشی كردەوە" ڕۆژی 20/3 لە واشنتنی پایتەختی ئەمەریكا یادەكە دەكرێتەوە، كە نوێنەری كۆنگرێس و حكوومەتی فیدڕاڵیی ئەمەریكا و كەسانی دیار لەو وڵاتەدا بەشدار دەبن و چەندین چالاكیی جۆراوجۆر ئەنجام دەدرێن، بەركەوتووانی چەكی كیمیاییش باس لە ڕۆژی كیمیابارانكردنی هەڵەبجە و كارەساتەكە بۆ میوانانی بەشداربووی یادەكە دەكەن".
کۆمێنت (0)
تا ئێستا هیچ کۆمێنتێک نەکراوە.