به‌یانی ئه‌مڕۆ پێنجشه‌مه چه‌ند ئه‌فسه‌رێكی سوپای سوودان چوونه پاڵ خۆپێشانده‌ران و هه‌ڵیانكوتایه سه‌ر ڕادیۆی فه‌رمی ئه‌و وڵاته‌وه و سروودی نیشتیمانیان له‌و ڕادیۆیه‌وه په‌خش كرد، هه‌روه‌ها له په‌خشی ئه‌و ڕادیۆیه‌شه‌وه ڕایانگه‌یاندووه كه پاش كه‌مێكی تر به‌یانێكی گرنگ ده‌رده‌كه‌ن.
چه‌ند سه‌رچاوه‌یه‌ك ئاماژه بۆ ئه‌وه ده‌كه‌ن كه تانك و زرێپۆش له‌به‌رده‌م كۆشكی سه‌رۆكایه‌تی سوودان له خه‌رتووم بڵاوبوونه‌ته‌وه كه هێمایه‌كه بۆ ئه‌وه‌ی سوپا كوده‌تا ده‌كات و ده‌چێته پاڵ ده‌نگی خۆپێشانده‌ران و دوورخستنه‌وه‌ی عومه‌ر به‌شیره له پۆستی سه‌رۆكایه‌تی و دامه‌زراندنی حكومه‌تێكی كاتی تا هه‌ڵبژاردن به‌ڕێوه‌ده‌چێت بۆ ئه‌وه‌ی سوودان ببوژێته‌وه كه ماوه‌ی نزیكه‌ی سێ مانگه خۆپێشاندان له دژی سه‌رۆكی وڵات به‌رده‌وامه و به ده‌یان كه‌س كوژران و برینداربوون.
هه‌ر له‌و كوده‌تایه‌شدا جێگری یه‌كه‌می سه‌رۆكی سوودان عه‌لی عوسمان و عبدولڕه‌حیم حوسین وه‌زیری به‌رگری پێشووی سوودان له‌لایه‌ن سوپاوه ده‌ستگیركران، له ئێستاشدا عومه‌ر به‌شیر سه‌رۆكی سوودان له شوێنی مانه‌وه‌ی خۆی ده‌ستبه‌سه‌ره.
جێی ئاماژه‌یه خۆپێشانده‌ران به‌په‌رۆشه‌وه سروودی نیشتیمانی ده‌ڵێنه‌وه و چاوه‌ڕوانی به‌یاننامه‌كه‌ی سوپا ده‌كه‌ن، هه‌روه‌ها گردبوونه‌وه‌ی پیشه‌وه‌ران داوا له خۆپێشانده‌ران ده‌كات له به‌رده‌م فه‌رمانده‌یی گشتی سوپا له شاری ئوم ده‌رمان كۆببنه‌وه و بۆ شوێنی تر بڵاونه‌بنه‌وه.
کۆمێنت (0)
تا ئێستا هیچ کۆمێنتێک نەکراوە.