مایك پۆمپیۆ وه‌زیری ده‌ره‌وه‌ی ئه‌مریكا له‌كاتی سه‌ردانیدا بۆ وڵاتانی ئه‌مریكای باشوور له وتارێكدا وتیی سه‌رمایه‌گوزارییه‌كانی چین له وڵاتانی جۆراوجۆری جیهان و به‌تایبه‌تیش وڵاتانی ئه‌مریكای باشوور ده‌بێته هۆی سه‌رهه‌ڵدانی ئابوورییه‌كی گه‌نده‌ڵ و له‌ناوچوونی ده‌سه‌ڵاتی ته‌ندرووست له‌م وڵاتانه‌دا.
پۆمپیۆ له وتاره‌كه‌یدا له سانتاگۆی پایته‌ختی چیلی له‌مباره‌یه‌وه وتی: هه‌رچه‌نده كه چین هاوبه‌شێكی گرنگی بازرگانییه بۆ ئێمه، به‌ڵام ئه‌مكاره‌ی په‌كین سه‌رمایه‌ی ناپاك ده‌خاته ناو ده‌ماره‌كانی ئابووریی ئه‌م وڵاتانه و رێگه بۆ درووستبوونی گه‌نده‌ڵیی خۆشده‌كات.
پۆمپیۆ هه‌روه‌ها وڵاتانی ئه‌مریكای باشووری ئاگادار كرده‌وه له بوونی رووسیا له‌ناو وڵاته‌كانیان و وتی: دابه‌زاندنی سه‌رباز و كردنه‌وه‌ی سه‌نته‌ری راهێنان له ڤه‌نزوێلا كرده‌وه‌یه‌كه ده‌بێته مایه‌ی هه‌ستیاریی و وروژان. جیا له‌مه‌ش رووسیا مێژوویه‌كی دوورودرێژی له په‌یوه‌ندیی هه‌یه له‌گه‌ڵ رێبه‌رانی دیكتاتۆری كوبا و نیكاراگوا، جیا له‌وه‌ی كه چه‌كیان پێده‌فرۆشێت و تۆوی ئاژاوه‌یان له‌لا بڵاو ده‌كاته‌وه.
پۆمپیۆ بڕیاره له چیلییه‌وه بڕواته پاڕاگوای و پیرۆ و كۆڵۆمبیا.
شایه‌نی ئاماژه‌یه كه حكومه‌تی چین ماوه‌یه‌كه ده‌ستیكردووه به سه‌رمایه‌گوزاریی له بواره جۆراوجۆره‌كان له‌چه‌ندین وڵاتی جیهاندا كه ئه‌مكاره ناڕه‌زایه‌تیی ئه‌مریكا و زۆرێك وڵاتی ئه‌وڕوپیی به‌دوای خۆیدا هێناوه.
وه‌رگێڕان و داڕشتنه‌وه‌ی / مه‌سعود
سه‌رچاوه / ده‌نگی ئه‌مریكا
کۆمێنت (0)
تا ئێستا هیچ کۆمێنتێک نەکراوە.