هه‌وڵده‌درێت پرۆژه وه‌ستاوه‌كان بخرێنه‌وه كار بۆئه‌وه‌ی نرخی مریشك و پێداویستییه‌كانی رێكبخرێن.
به سه‌رپه‌رشتی ئاوات محه‌مه‌د- قائیمقامی سلێمانی و به‌شداری لیژنه‌ی دیاریكردنی به‌روبومی ناوخۆیی كه له نوێنه‌ری ڤێتێرنه‌ری و كشتوكاڵ و سامانی ئاژه‌ڵ پێكدێت له‌گه‌ڵ خاوه‌ن پرۆژه‌كانی به‌رهه‌مهێنانی جوچك هه‌ڵهێنه‌ر و هێلكه‌ی تروكاندن، ئه‌مرۆ 2019.4.29 كۆبونه‌وه‌یه‌ك له دیوانی قئیمقامیه‌تی سلێمانی ئه‌نجامدرا.
له‌باره‌ی كۆبونه‌وه‌كه‌وه رزگار حمد خدر، جێگری به‌ڕێوبه‌ری گشتی كشتوكاڵی سلێمانی رایگه‌یاند: دوای ئه‌وه‌ی كه بینیمان به‌م دواییه نرخی جوچكه به‌رزبووه‌ته‌وه و ئه‌وه‌ش كاریگه‌ری له‌سه‌ر نرخی مریشك كردووه، بڕیارمان دا پێداچونه‌وه به نرخی جوچكه و نرخ و توانای پێداویستییه‌كانی به‌رهه‌مهێنانی هێلكه‌ی تروكاندن و جوچكه بۆ كێڵگه په‌له‌وه‌رییه‌كان بكرێت.
وتیشی: له كۆبونه‌وه‌كه‌دا بڕیاردرا كاری جدی بۆ پشتیوانی له پرۆژه‌كانی به‌رهه‌مهێنانی هێلكه‌ی تروكاندن بكه‌ین بۆئه‌وه‌ی پێداویستییه‌كانی ناوخۆ پڕبكه‌نه‌وه و له‌ناوخۆشدا بازاڕیان بۆ بدۆزرێته‌وه و له رێگه‌ی پرۆژه‌یه‌كه‌وه كه به‌رزیده‌كه‌ینه‌وه بۆ پارێزگای سلێمانی و وه‌زاره‌تی كشتوكاڵ و ئه‌نجومه‌نی وه‌زیران كار بۆ به‌گه‌ڕخستنه‌وه‌ی پرۆژه وه‌ستاوه‌كانی هێلكه‌ی تروكاندن و هه‌ڵهێنانی جوچكه بكه‌ین، چونكه به‌شێكن به پرۆسه‌ی به‌رهه‌مهێنانی مریشك كه پێداویستی سه‌ره‌كی هاوڵاتیانه.
وتیشی بۆمان ده‌ركه‌وت كه به‌شێك له پرۆژه‌كانی جوچك هه‌ڵهێنه‌ر به كه‌متر له توانای خۆیان كارده‌كه‌ن و زۆربه‌ی هێلكه‌كانیش له وڵاتانی ده‌ره‌وه ده‌هێنرێن، بۆیه كار بۆ چاره‌سه‌ركردنی ئه‌و كێشانه ده‌كه‌ین و هه‌وڵده‌ده‌ین ته‌واوی پرۆسه‌ی به‌رهه‌مهێنانی هێلكه و جوچك هه‌ڵهێنان و به‌رهه‌مهێنانی مریشك له‌ناوخۆدا بێت و پێویستمان به هاورده‌ی پێداویستییه‌كانی نه‌بێت و له‌رێگه‌ی رێكخستنی ئه‌و كارانه‌شه‌وه ده‌توانین نرخ به‌ته‌واوی دیاری بكه‌ین.
دارشتنه‌وه‌ى هه‌واڵ - شوان عه‌زیز
کۆمێنت (0)
تا ئێستا هیچ کۆمێنتێک نەکراوە.