به‌ بیانووی شه‌ره‌ف برایه‌ک خوشکه‌که‌ی له‌سێداره‌ دا و پاشانیش به‌چه‌قۆ سه‌ری بڕی

به‌ پێی ڕاپۆرتێكی ڕێكخراوی مافی مرۆڤی هه‌نگاو  دره‌نگانی شه‌وی شه‌ممه‌ له‌ پارێزگای ئیلامی ڕۆژهه‌ڵاتی كوردستان كچێكی گه‌نج له‌ لایه‌ن براكه‌یه‌وه‌ له‌ سێداره‌ درا.

كچه‌ گه‌نجێكی خه‌ڵكی په‌هله‌(زه‌ڕین ئاوا) ى سه‌ربه‌ شاری دێهلۆڕان له‌ پارێزگای ئیلام به‌ ناوی "مه‌ریه‌م به‌ختیاری" ته‌مه‌ن 29 ساڵان شه‌وی شه‌ممه‌ 4/5/2019 له‌لایه‌ن براكه‌یه‌وه‌ به‌ ناوی "مسته‌فا به‌ختیاری" له‌سێداره‌ درا.

مسته‌فا پاش له‌سێداره‌دانی مه‌ریه‌می خۆشكی، به‌ چه‌قۆ سه‌ری خوشكه‌ 29 ساڵانه‌كه‌ی خۆی لێده‌كاته‌وه‌ و جه‌سته‌ی ده‌شێوێنێت.

به‌ پێی زانیارییه‌كانی هه‌نگاو مسته‌فا به‌ بیانووی پاراستنی شه‌ره‌ف و نامووس، خوشكه‌كه‌ی كوشتووه‌، چونكه‌ مریه‌م دوو ساڵ له‌وه‌ پێش له‌ گه‌ڵ كوڕێكی خه‌ڵكی دێهلۆڕان په‌یوه‌ندی خۆشه‌ویستی هه‌بوه‌ و له‌به‌ر ئه‌وه‌ی كه‌ كوڕه‌كه‌ له‌گه‌ڵ مریه‌م هاوسه‌رگیری نه‌كردووه‌، كوشتویه‌تی.

شایه‌نی باسه‌ دوای شه‌وێك له‌ كوشتنی خوشكه‌كه‌ی ئه‌مڕۆ یه‌كشه‌ممه‌ موسته‌فا به‌ختیاری خۆی ڕاده‌ستی پۆلیس كردووه‌ و دانی به‌ تاوانه‌كه‌یدا ناوه‌.