ئه‌مڕۆ په‌رله‌مان سه‌رۆکی هه‌رێمی کوردستان هه‌ڵده‌بژێریت

ئه‌مڕۆ سێشه‌ممه‌ په‌رله‌مانی كوردستان سه‌رۆكی هه‌رێمی كوردستان هه‌ڵده‌بژێریت.

دوو رۆژ له‌مه‌وبه‌ر ده‌سته‌ی سه‌رۆكایه‌تی په‌رله‌مانی كوردستان، به‌رنامه‌ی كاری دانیشتنی ژماره‌ (6)ی ئاسایی رۆژی سێشه‌مه‌ رێكه‌وتی 2019/5/28ی راگه‌یاند، كه‌ تیایدا هاتووه‌..

به‌پێی حوكمی برگه‌كانی (یه‌كه‌م، دووه‌م، سێیه‌م) له‌ مادده‌ی (16) و برگه‌ی (سَییه‌م) له‌ مادده‌ی (18) و برگه‌كانی (یه‌كه‌م و پێنجه‌م) له‌ مادده‌ی (54) و مادده‌كانی (47، 52، 55، 57،56) له‌ په‌یڕه‌وی ناوخۆی په‌رله‌مانی كوردستان ـ عێراق، ده‌سته‌ی سه‌رۆكایه‌تیی په‌رله‌مان بڕیاریدا به‌رنامه‌ی كاری دانیشتنی ژماره‌ (6)ی ئاسایی خولی به‌هاره‌ی ساڵی یه‌كه‌م له‌ خولــی پێنجه‌می هه‌ڵبژاردنی په‌رله‌مان له‌ كاتژمێر (11)ی پێشنیوه‌ڕۆی رۆژی سێشه‌ممه‌ رێكه‌وتی 2019/5/28 به‌م شێوه‌یه‌ بێت:

یه‌كه‌م: خستنه‌ڕوو و هه‌ڵبژاردنی پاڵێوراوه‌كان بۆ پۆستی سه‌رۆكی هه‌رێم، به‌پێی حوكمی خاڵی (5 و 6)ی بڕگه‌ی (یه‌كه‌م)ی مادده‌ی (4) له‌ یاسای ژماره‌ (1)ی ساڵی 2019، (یاسای كاراكردنه‌وه‌ی دامه‌زراوه‌ی سه‌رۆكایه‌تیی هه‌رێمی كوردستان-عێراق و هه‌مواری شێوازی هه‌ڵبژاردنی سه‌رۆك تا په‌سندكردنی ده‌ستوور).

داڕشتنه‌وه‌ی هه‌واڵ /رزگار