به‌پێى هه‌واڵێكى ڕۆیته‌رز، ئه‌مڕۆ سێ شه‌ممه 28ى ئایارى 2019، له تۆكیۆى پایته‌ختى وڵاتى ژاپۆن هێرشبه‌رێك به دوو چه‌قۆوه هێرشى كرده سه‌ر قوتابیان له یه‌كێك له وێستگه‌كانى پاس و به‌هۆیه‌وه خوێندكارێكى كچی ته‌مه‌ن 12 ساڵ و پیاوێكى ته‌مه‌ن 39 ساڵ كوژران و 15 قوتابى تر كه هه‌موویان كچن برینداربوون.
به‌پێى هه‌واڵى میدیاكانى ژاپۆن كچه‌كان ته‌مه‌نیان له نێوان 6 بۆ 12 ساڵ ده‌بن و قوتابى قوتابخانه‌ى كاسۆلیكیى تایبه‌تن له شارى كاواساكى له باشوورى تۆكیۆ، له‌كاتى سه‌ركه‌وتنیان بۆ نێو پاسه‌كه هێرشبه‌ره‌كه په‌لامارى قوتابییه‌كانى داوه.
هاوكات پۆلیسى شارى كاواساكى رایانگه‌یاند: 15 قوتابى و ئافره‌تێك بریندارن و ره‌وانه‌ى نه‌خۆشخانه كراون و كچێكى ته‌مه‌ن 12 ساڵ و پیاوێكى ته‌مه‌ن 39 ساڵیش كوژراون .
هه‌روه‌ها كه‌سه هێرشبه‌ره‌كه پاش هێرشكردنه‌كه‌ى بۆ سه‌ر قوتابییه‌كان به‌چه‌قۆ ملى خۆى بریندار كردووه و به‌بێ هۆشی ده‌ستگیركراوه و دواتر به‌هۆى سه‌ختى برینه‌كه‌ی گیانى له‌ده‌ستدا.
به‌گوێره‌ى زانیارییه‌كانى پۆلیس هێرشبه‌ره‌كه خه‌ڵكى كاواساكى بووه و ته‌مه‌نى نزیكه‌ی 50 ساڵ ده‌بوو و تا ئێستاش هۆكاری هێرشكردنه‌كه نه‌زانراوه.
جێى ئاماژه‌یه پێشووتر نموونه‌ى ئه‌م جۆره هێرشانه له ژاپۆن هه‌بووه، له ساڵى 2016 شارۆچكه‌یه‌كى بچووك له نزیك تۆكیۆ پیاوێك به چه‌قۆ هێرشى كرده خانه‌یه‌كى به‌ساڵاچووان و 19 نه‌خۆشى له‌خه‌ودا كوشت.
له ساڵى 2001 له ئۆساكا 8 منداڵ كوژران له‌لایه‌ن پاسه‌وانی قوتابخانه‌كه‌یان و هه‌روه‌ها له ساڵى 2010 زیاتر له 12 كه‌س برینداربوون له پاسێكى قوتابخانه‌و و پاسێكى ڕێبواران له قه‌راغ شارێكى تۆكیۆى پایته‌ختى ژاپۆن.
ئاماده‌كردن و وه‌رگێڕان/ سیروان عه‌زیز
کۆمێنت (0)
تا ئێستا هیچ کۆمێنتێک نەکراوە.